Лукашэнка падпісаў рашэнне рэспубліканскага рэферэндуму

МІНСК, 4 сак - Sputnik. Аляксандр Лукашэнка падпісаў рашэнне рэспубліканскага рэферэндуму.

У мерапрыемстве прынялі ўдзел афіцыйныя асобы, журналісты і іншыя госці - каля тысячы чалавек. Сярод прысутных быў заўважаны і малодшы сын Аляксандра Лукашэнкі - Мікалай.

Урачыстае мерапрыемства распачаў старшыня ЦВК Ігар Карпенка. Ён яшчэ раз нагадаў вынікі галасавання: удзел узялі 5 359 403 грамадзяніны (78,63% ад колькасці выбаршчыкаў). За змены прагаласавала 4440830 грамадзян (82,86% ад тых, хто прыняў удзел, або 65,16% ад агульнай колькасці грамадзян, унесеных у спіс для галасавання).

"Рашэнне па вынесеным на рэферэндум пытанні прынята. Парушэнняў заканадаўства, якія маглі б паўплываць на вынікі волевыяўлення грамадзян, не ўстаноўлена", - заявіў Ігар Карпенка.

Рашэнне, прынятае народам на рэферэндуме, падпісаў Аляксандр Лукашэнка. Новая Канстытуцыя набудзе моц 15 сакавіка - у Дзень Канстытуцыі Рэспублікі Беларусь.

Асноўны дзень для галасавання на рэферэндуме адбыўся 27 лютага.

У бюлетэні было вынесена адно пытанне: "Ці прымаеце Вы змяненні і дапаўненні Канстытуцыі Рэспублікі Беларусь?" – і два варыянты адказу: "так" ці "не".

Беларусам прапануецца надзяліць Усебеларускі народны сход новымі паўнамоцтвамі, якія зробяць яго вышэйшым прадстаўнічым органам улады, які вызначае знешнюю і ўнутраную палітыку краіны.

Паводле рэдакцыі новай Канстытуцыі, рэспубліка выключае ваенную агрэсію ў бок іншых дзяржаў - гэта палажэнне замяняе вызначэнне Беларусі як бяз'ядзернай і нейтральнай краіны. Дадаецца, што наша краіна будзе развіваць атамную энергетыку ў мірных мэтах.

Акрамя таго, замацавана паняцце шлюбу як саюз мужчыны і жанчыны. Дададзена, што праява патрыятызму з'яўляецца асноўным абавязкам кожнага грамадзяніна краіны.

У праекце Канстытуцыі было прадугледжана абмежаванне на магчымасць абірацца прэзідэнтам: сказана, што адна і тая ж асоба можа займаць гэтую пасаду не больш за два тэрміны.

Прэзідэнт абіраецца тэрмінам на 5 гадоў. Пасля складання сваіх паўнамоцтваў (альбо датэрмінова ў выпадку адстаўкі) прэзідэнт можа стаць пажыццёвым членам Савета Рэспублікі.

Пашыраны артыкул 89, дзе гаворыцца, што гонар і годнасць прэзідэнта ахоўваецца законам. У праекце таксама гаворыцца, што пасля спынення сваіх абавязкаў прэзідэнт не можа быць прыцягнуты да адказнасці за дзеянні, учыненыя ў сувязі з ажыццяўленнем ім прэзідэнцкіх паўнамоцтваў.

Частка паўнамоцтваў прэзідэнта па прызначэнні на пасаду і вызваленні ад яе пераразмяркоўваюцца.

Агульная колькасць грамадзян, унесеных у спісы для галасавання, склала 6,8 мільёна. У галасаванні прынялі ўдзел каля 5,4 мільёна чалавек - 78,63%.

• За змены прагаласавала 82,86% (4440830 чалавек, 65,16% ад агульнай колькасці грамадзян, надзеленых правам голасу)

• Супраць - 12,78%

• Несапраўдныя бюлетэні - 4,36%