МІНСК, 18 сак - Sputnik. Аб'ём ВУП у бягучых цэнах склаў 28,1 млрд рублёў, або ў супастаўных цэнах 101,2% да ўзроўню студзеня - лютага 2021 года, паведамілі ў прэс-службе Белстата.
Паводле афіцыйнай статыстыкі, індэкс-дэфлятар ВУП у студзені - лютым 2022 года ў адносінах да аналагічнага перыяду папярэдняга года склаў 116,5%.
Цікава, што яшчэ месяцам раней унутраны валавы прадукт рос куды хутчэйшымі тэмпамі. У студзені ВУП павялічыўся ў супастаўных цэнах на 2,7% да ўзроўню студзеня 2021 года.
Тады ВУП у бягучых цэнах склаў 14,9 мільярда рублёў, ці 5,8 мільярда долараў па курсе Нацыянальнага банка на 18 сакавіка 2022 года. Сёння па курсе рэгулятара 28,1 мільярда рублёў - 8,5 мільярда долараў. Атрымліваецца, што пры амаль двухразовым росце ў рублях, унутраны валавы прадукт у доларах па афіцыйным курсе вырас усяго ў паўтара разы.
Раней стала вядома, што паводле вынікаў 2021 года ВУП Беларусі, нягледзячы ні на што, вырас на 2,3%. Аб'ём эканомікі ў бягучых коштах склаў 173,2 мільярда рублёў.
Пры гэтым у міністэрстве эканомікі ўказалі, што рост ВУП на 0,5% перавысіў паказчыкі, якія ўлады закладвалі ў прагноз па развіццю рэспублікі на мінулы год.
У сваю чаргу Еўразійскі банк развіцця апублікаваў прагноз, згодна з якім беларускі ВУП пры базавым сцэнары развіцця ў бягучым годзе павялічыцца на 0,7%. У сярэднетэрміновай перспектыве беларускай эканоміцы свеціць рост усяго на 1% у год.
>>> Больш актуальных навін – у Telegram-канале Sputnik Беларусь