МІНСК, 26 кра - Sputnik. Фізічны пуск другога энергаблока адбыўся на Беларускай АЭС у Астраўцы, паведаміў у аўторак кіраўнік карпарацыі "Расатам" Аляксей Ліхачоў.
"Другі блок – фізічны пуск ажыццёўлены, і спадзяемся да канца года здаць яго ў прамысловую эксплуатацыю", – сказаў Ліхачоў у ходзе выступлення ў Савеце Федэрацыі.
Пасля фізічнага пуску пачынаюцца даследаванні актыўнай зоны рэактара на адпаведнасць усім патрабаванням. Толькі затым, пасля паспяховага выканання даследчых работ, робіцца энергетычны пуск, тады энергаблок падключаецца да энергасістэмы краіны.
Тым часам першы энергаблок, які напярэдадні быў часова спынены для частковай перагрузкі свежага ядзернага паліва, выпрацаваў з моманту свайго пуску 8 мільярдаў квт.гадз электраэнергіі.
Беларуская АЭС
Атамная электрастанцыя ў Астраўцы будуецца па расійскім праекце "ВВЭР-1200", які адпавядае ўсім нормам бяспекі МАГАТЭ.
БелАЭС складаецца з двух энергаблокаў, магутнасць кожнага будзе складаць 1200 МВт. Фізічны пуск першага энергаблока адбыўся ў жніўні 2020 года, у агульную энергасістэму краіны яго ўключылі ў лістападзе таго ж года.
Цяпер БелАЭС выпрацоўвае 22% ад агульнага аб'ёму электраэнергіі ў рэспубліцы, а з уводам другога энергаблока яе доля ў энергабалансе краіны складзе 40%.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь