Свята на тры дні: праграма фестывалю нацыянальных культур у Гродна

ГРОДНА, 26 мая – Sputnik, Іна Грышук. Стала вядома праграма аднаго з самых маштабных фестываляў краіны - Фестывалю нацыянальных культур, які пройдзе ў Гродне з 3 па 5 чэрвеня.

Ён збярэ прадстаўнікоў больш як 30 нацыянальнасцей, а святочныя мерапрыемствы будуць доўжыцца тры дні ў Гродна і на пляцоўцы на Аўгустоўскім канале.

Самай яркай падзеяй першага дня фестывалю стане традыцыйнае тэатралізаванае шэсце, якое збярэ прадстаўнікоў 31 нацыянальнасці. Яны пройдуць ад плошчы Леніна да Савецкай. Потым пройдзе афіцыйнае адкрыццё, канцэртная праграма. Увечары запланаваны салют на Савецкай, а пасля яго - гала-канцэрт заслужанага артыста Беларусі Руслана Аляхно.

Святочныя мерапрыемствы ў рамках фестывалю будуць праходзіць у Гродна, пачынаючы з раніцы пятніцы. На вуліцы Савецкай будзе працаваць выстава-кірмаш рамеснікаў, у выставачных цэнтрах - выставы, у лютэранскай кірсе - канцэрт арганнай музыкі. У парку Жылібера разгорне працу мабільны комплекс Музея гісторыі Вялікай Айчыннай вайны.

Яшчэ адной забаўляльнай пляцоўкай на працягу дня будзе плошча Леніна. Тут будзе адкрыта кавярня пад адкрытым небам, а ўвечары адбудзецца канцэрт. Вечарам кінатэатр "Чырвоная зорка" арганізуе работу кінападворка і пакажа кіно на вуліцы.

Нацыянальныя падворкі, на якіх будуць прэзентаваць культуру і кухню розных нацыянальнасцей, будуць працаваць у суботу, 4 чэрвеня з 12 да 16 гадзін дня. Па традыцыі падворкі размесцяцца на цэнтральных вуліцах Гродна.

Напрыклад, на вуліцы Савецкай можна будзе знайсці рускія, украінскіяе, армянскія, азербайджанскія падворкі, пляцоўкі карэйцаў, дагестанцаў, грэкаў. На плошчы Леніна размесціцца беларускі падворак, на Замкавай - падворкі літоўцаў, эстонцаў, немцаў, італьянцаў, палякаў, малдаван. На Ажэшка размесцяцца грузіны, чувашы.

Кожная нацыянальнасць рыхтуе ўласную праграму, каб здзіўляць гасцей свята.

На плошчы Савецкай у абед пройдзе канцэрт ансамбля "Песняры", а вечарам канцэрт Аляксандра Саладухі. На плошчы Тызенгаўза адбудзецца спартыўны фестываль. Музычнай пляцоўкай у гэты дзень стане і парк Жылібера. Яркім завяршэннем дня тут стане фаер-шоу.

У трэці фестывальны дзень гулянні пройдуць на тэрыторыі Аўгустоўскага канала ля шлюза Дамброўка з 13 да 20 гадзін. Тут будуць працаваць інтэрактыўныя пляцоўкі, пройдуць канцэрты, спаборніцтвы па хадзьбе з перашкодамі, шоу асілкаў, фестываль рыбалкі. Адбудуцца майстар-класы па гатаванні страў беларускай кухні і многае іншае.

Фестываль нацыянальных культур лічыцца візітнай карткай Гродна, праводзіцца амаль 30 гадоў раз на два гады. У бягучым годзе ён пройдзе пасля перапынку. У 2020 годзе яго адмянілі з-за пандэміі. У мінулыя гады свята збірала дзясяткі тысяч гасцей і ўдзельнікаў самых розных нацыянальнасцей.