У Расіі стартаваў АДЭ: як беларусам здаць адзіны дзяржэкзамен?

У Расіі 26 мая стартавала здача адзінага дзяржаўнага экзамена. Дзе і як беларускім абітурыентам, якія хочуць паступіць у расійскія ВНУ, здаць АДЭ? Sputnik вывучыў варыянты.

Зараз расійскія ўніверсітэты прымаюць беларусаў трыма спосабамі: па выніках унутраных выпрабаванняў ВНУ, па квоце Рассупрацоўніцтва, па выніках АДЭ і ЦТ.

У Беларусі няма ніводнага пункта АДЭ, таму для здачы экзаменаў беларусы ездзяць у Расію. У гэтым годзе будзе задзейнічана амаль 6 тысяч экзаменацыйных пунктаў, больш за ўсё - у Маскве. Таксама здаць выпрабаванні недалёка ад Беларусі можна ў Пскове, Смаленску, Ноўгарадзе, Санкт-Пецярбургу і Бранску.

Каб зарэгістравацца на дзяржэкзамен, трэба прывезці ў расійскую ВНУ, куды вы плануеце паступаць, даведку са школы з указаннем вывучаных прадметаў, пашпарт, заяву і атэстат. Паколькі беларусы атрымліваюць дакумент аб заканчэнні сярэдняй навучальнай установы ў чэрвені, то могуць напісаць АДЭ толькі ў верасні. Расіяне могуць здаць іспыт у сакавіку-красавіку і чэрвені-ліпені.

Руская мова і матэматыка – два абавязковыя прадметы на АДЭ. Астатнія можна выбіраць па жаданні. У цэлым жа адзіны дзяржаўны экзамен праводзіцца па 15 дысцыплінах. Да дадатковых прадметаў адносяцца біялогія, геаграфія, гісторыя, літаратура, грамадазнаўства, фізіка, хімія, інфарматыка і замежныя мовы – англійская, нямецкая, французская, іспанская, кітайская. Вынікі сапраўдныя чатыры гады.

На АДЭ могуць не дапусціць у выпадку акадэмічнай запазычанасці - калі ў школьніка няма гадавой адзнакі па нейкім прадмеце, які вывучаўся ў выпускным класе. Таксама экзаменатары маюць права не дапусціць да здачы, калі ў дзённіку стаіць нездавальняючая (ніжэй за 4) гадавая ацэнка па любому з прадметаў праграмы 10 і 11 класаў.

Або, напрыклад, калі выпускнік не пісаў выніковае сачыненне або выклад. Але гэтае правіла дзейнічае толькі для расійскіх выпускнікоў. Беларусам для доступу да АДЭ пісаць выніковае сачыненне не трэба. Гэты этап можна прайсці па жаданні, калі жадаеш атрымаць дадатковы бал пры паступленні.

У АДЭ прымяняюцца аднатыпныя заданні са школьнай праграмы. Адказы запісваюцца на спецыяльных бланках і апрацоўваюцца камп'ютарам і членамі экспертнай камісіі.

Максімальная колькасць балаў - 100, толькі ў матэматыцы базавага ўзроўню прымяняецца пяцібальная сістэма. Каб экзамен залічылі, неабходна атрымаць: па базавай матэматыцы - 3 балы з 5; па профільнай матэматыцы - не менш за 27 з 100; па рускай мове - не менш за 24 (у ВНУ - 36); па грамадазнаўстве - 42; інфарматыцы - 40; геаграфіі - 37; біялогіі, фізіцы і хіміі - 36; літаратуры і гісторыі - 32; замежным мовам - 22.

Асноўны перыяд здачы АДЭ адбудзецца з 26 мая па 2 ліпеня. Самы масавы экзамен, па рускай мове, пройдзе ў два дні - 30 і 31 мая. АДЭ па інфарматыцы, які ў 2021-м выпускнікі ўпершыню здавалі на камп'ютарах, таксама падзелены на два дні: 20 і 21 чэрвеня. Два дні адведзены і для экзамена па замежнай мове - 16 і 17 чэрвеня.

З 23 чэрвеня па 2 ліпеня будуць рэзервовыя дні для здачы АДЭ па ўсіх прадметах.

У дадатковы перыяд з 5 па 20 верасня экзамен пройдзе толькі па абавязковых прадметах - рускай мове і базавай матэматыцы для тых выпускнікоў, якія пазней атрымалі атэстат (напрыклад, для беларусаў). АДЭ сёлета плануюць здаць больш за 700 тысяч чалавек, з іх амаль 630 тысяч - выпускнікі-2022.