Акрамя Расіі: Беларусь істотна зменшыла пастаўкі ў краіны СНД

МІНСК, 6 чэр - Sputnik. Беларусь у красавіку зменшыла пастаўкі ў краіны СНД, за выключэннем Расіі, на 75,4%, аб гэтым паведамілі ў прэс-службе Еўразійскага банка развіцця.

Паводле звестак ЕАБР, у цэлым беларускі экспарт за красавік знізіўся на 22,4%. На гэта паўплывала памяншэнне паставак у краіны па-за СНД - на 37%, а таксама ў краіны, якія ўваходзяць у Садружнасць - на 75,4%.

Нагадаем, у СНД, акрамя Беларусі і Расіі, уваходзяць Азербайджан, Арменія, Казахстан, Кыргызстан, Малдова, Таджыкістан і Узбекістан.

У вартасным аб'ёме знешні тавараабарот Беларусі скараціўся ў красавіку амаль на чвэрць - на 24,5%. Аналітыкі канстатуюць, што ў той жа час знізіўся і вартасны аб'ём беларускага імпарту - на 26,3%. Гэта звязана з аслабленнем спажывецкага і інвестыцыйнага попыту ў краіне.

У ЕАБР ужо робяць прагноз: сальда знешняга гандлю за год складзе амаль у 3-4 разы менш, чым па выніках 2021-га.

У красавіку Беларусь павялічыла пастаўкі толькі ў Расію - на 16,2%. Гэта, на думку аналітыкаў, можа ўказваць на частковую пераарыентацыю гандлёвых патокаў.

Раней прэм'ер-міністр рэспублікі Раман Галоўчанка заяўляў, што ў цяперашніх умовах на фоне заходніх санкцыяў Беларусь вымушана дыверсіфікаваць свой экспарт.

"У сілу вядомых абставін нашы экспартныя патокі вымушаны пераарыентавацца на тыя рынкі, дзе гэта запатрабавана", – адзначаў ён.

У бліжэйшы час доля ў беларускім экспарце будзе павялічвацца не толькі для Расіі, але і для іншых дзяржаў ЕАЭС, Афрыкі, Лацінскай Амерыкі і азіяцкіх краін. Аснову экспарту складаюць прадукты харчавання, сельгастэхніка, калійныя ўдабрэнні.

"Пачынаючы са студзеня, доля Расіі ўжо вырастае натуральным чынам, больш за тое мы прыстойна прыбаўляем па кошце нашых тавараў, за кошт гэтага атрымліваем дадатковую валютную выручку", - канстатаваў кіраўнік урада.

Таксама Галоўчанка адзначаў, што па выніках першага квартала сальда для Беларусі склалася станоўчае - у памеры каля 1 мільярда долараў.