МІНСК, 27 чэр - Sputnik. Беларусь і Расія за доўгія гады адносін дакладна зразумелі, што не здрадзяць адзін аднаму, такой думкай падзяліўся кіраўнік беларускага МЗС Уладзімір Макей у эксклюзіўным інтэрв'ю Sputnik.
Міністр звярнуў увагу, што ні Беларусь, ні Расія ніколі не ўзнімалі тэму адмовы ад суверэнітэту, больш за тое, паміж кіраўнікамі дзвюх дзяржаў ёсць дакладная дамоўленасць не закранаць гэту тэму. "Развіваць адносіны выдатна можна і ў рамках Саюзнай дзяржавы, у артыкуле Дагавора аб стварэнні якога сказана, што суверэнітэт абедзвюх краін захоўваецца", - дадаў ён.
Як будзе развівацца сітуацыя ў далейшым, міністру не вядома, але "за 30 гадоў адносін метадам спроб і памылак, набіваючы часам і гузы на лбе, спатыкаючыся, паднімаючыся, мы прыйшлі да вельмі высокага ўзроўню інтэграцыі".
Таксама, паводле слоў Макея, з улікам апошніх падзей, Беларусь і Расія сталі больш давяраць адзін аднаму.
"І я думаю, што мы дакладна зразумелі: ніхто з нас не з'яўляецца здраднікамі ў адносінах да адзін аднаго. Не было б шчасця, ды няшчасце дапамагло. Хачу дакладна адзначыць, што Беларусь ніколі не была і не будзе здраднікам у адносінах да Расіі. І не трэба нас папракаць, як некаторыя робяць, "вы там ледзь не ляглі пад Расію, падпарадкаваліся"... Не. Кожная з краін праводзіць сваю палітыку, але мы заўсёды казалі, што мы будзем дакладна выконваць нашы саюзніцкія абавязацельствы", - падкрэсліў міністр. Для Беларусі гэта пытанне прынцыповае, дадаў ён.
Паводле слоў кіраўніка знешнепалітычнага ведамства, паміж Беларуссю і Расіяй у рамках Саюзнай дзяржавы пануе прынцып дружалюбнай і брацкай салідарнасці. "І гэтым усё тлумачыцца. Таму за 30 гадоў мы дасягнулі вельмі многага. І ў першую чаргу, як мне здаецца, у псіхалагічным усведамленні таго, што мы павінны быць разам", - адзначыў ён.
Арыентыр для іншых інтэграцый
Міністр перакананы, што вынікі, якіх удалося дабіцца Саюзнай дзяржаве, ужо з'яўляюцца арыенцірам для большай інтэграцыі на постсавецкай прасторы, а ў будучым будзе яшчэ большым прыкладам для такіх утварэнняў, як Еўразійскі эканамічны саюз, Садружнасць Незалежных Дзяржаў і іншых.
"Калі б не было гэтага санкцыйнага супрацьстаяння, думаю, што нашы адносіны развіваліся б яшчэ больш актыўна і хутчэй", - лічыць Макей.
Асновай усяго, паводле яго слоў, вядома ж, з'яўляецца гандлёва-эканамічнае супрацоўніцтва. Так, толькі за мінулы год тавараабарот паміж Расіяй і Беларуссю перавысіў 40 мільярдаў долараў і вырас больш як на 30%. І сёлета, нягледзячы на санкцыйны ціск, працягвае расці і вырас на 10% за 4 месяцы.
Поўную версію інтэрв'ю з міністрам замежных спраў Уладзімірам Макеем чытайце на Sputnik Беларусь>>