МІНСК, 11 ліп - Sputnik. Ваеннаслужачым і супрацоўнікам сілавых структур Беларусі выезды за мяжу цяпер трэба будзе ўзгадняць з кіраўніцтвам, дзяржслужачым - з урадам.
Аб гэтым гаворыцца ў законапраекце аб змяненні закона "Аб парадку выезду з Рэспублікі Беларусь і ўезду ў Рэспубліку Беларусь грамадзян Рэспублікі Беларусь", які ўнесены ў парламент і будзе абмяркоўвацца на чарговай сесіі. Праект апублікаваны на Нацыянальным прававым інтэрнэт-партале.
Адзін з пунктаў датычыцца ўзброеных сіл, органаў пагранічнай службы, унутраных войскаў МУС, органаў дзяржбяспекі, транспартных войскаў, службы бяспекі Прэзідэнта Беларусі, аператыўна-аналітычнага цэнтр пры прэзідэнце, СК, ДКСЭ, органаў унутраных спраў, органаў фінансавых расследаванняў КДК, органаў і падраздзяленняў па НС. Адмовіць у выездзе гэтай катэгорыі грамадзян могуць "у мэтах забеспячэння інтарэсаў нацыянальнай бяспекі да спынення абставін, якія перашкаджаюць іх выезду".
Акрамя гэтага, вайскоўцы і супрацоўнікі сілавых органаў павінны на перыяд праходжання ваеннай службы перадаць біяметрычныя пашпарты (звычайныя, дыпламатычныя або службовыя) у аддзел кадраў сваёй арганізацыі. Пры гэтым парадак выезду для сілавікоў вызначаюць адпаведныя дзяржорганы. Што да дзяржаўных служачых, правілы выезду для іх устанаўлівае ўрад.
Адзначым, што гэтыя правілы негалосна дзейнічалі і да гэтага, аднак зараз гэта будзе ўстаноўлена афіцыйна.
Пад наглядам КДБ
Забарону на выезд могуць увесці ў дачыненні да тых, каму прад'яўлены іск у парадку грамадзянскага судаводства або судаводства па эканамічных справах. Таксама гэта можа закрануць грамадзян, у дачыненні да якіх распачаты адміністрацыйны працэс.
Акрамя таго, КДБ, калі законапраект прымуць, зможа абмяжоўваць выезд за мяжу беларусаў, калі гэта супярэчыць інтарэсам нацыянальнай бяспекі.
Грамадзяне, выезд для якіх часова абмежаваны, тым не менш, могуць патрапіць за мяжу па шэрагу падставаў:
- у сувязі з неабходнасцю яго ўдзелу ў крымінальным працэсе за межамі рэспублікі;
- калі грамадзяніну патрэбна медыцынская дапамога, якую нельга аказаць у Беларусі;
- у сувязі з цяжкім захворваннем або смерцю блізкага сваяка.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь