Візіт Пеласі на Тайвань нанясе сур'ёзныя страты адносінам з ЗША – КНР

МІНСК, 1 жні – Sputnik. Кітай папярэдзіў ЗША аб тым, што візіт Пеласі на Тайвань пацягне за сабой сур'ёзныя наступствы для супрацоўніцтва краін. Аб гэтым афіцыйны прадстаўнік МЗС КНР Чжао Ліцзянь заявіў у панядзелак на брыфінгу.

Паводле слоў дыпламата, візіт Пеласі стане грубым умяшаннем ва ўнутраныя справы кітайскага боку. Ён таксама будзе расцэньвацца як наўмыснае парушэнне прынцыпу "аднаго Кітая". Гэта негатыўна адаб’ецца на адносінах паміж ЗША і Кітаем, а таксама прывядзе да з’яўлення пагрозы для стабільнасці і міру, якія ўсталяваліся ў Тайваньскім праліве.

Дыпламат дадаў, што КНР не застанецца ў баку і прыме рашучыя меры, накіраваныя на абарону дзяржаўнага суверэнітэту і тэрытарыяльнай цэласнасці. Аб тым, што сабой будуць уяўляць меры кітайскага боку, ён не паведаміў.

Нагадаем, што некаторы час таму спікер палаты прадстаўнікоў ЗША Нэнсі Пеласі адправілася ў азіяцкае турнэ, падчас якога яна мае намер наведаць Японію, Паўднёвую Карэю, Малайзію і Сінгапур. Таксама шэраг СМІ паведамляў аб магчымасці яе візіту таксама на Тайвань, аднак сама Пеласі не каменціравала такі варыянт паездкі, спасылаючыся на патрабаванні бяспекі.

Аб магчымым візіце Пеласі на Тайвань ішла размова яшчэ ў красавіку, але тады турнэ было адменена з-за таго, што палітык заразілася каронавірусам. Па даных СМІ, кітайскімі дыпламатамі была праведзена актыўная праца, каб данесці да амерыканскіх кангрэсменаў, што візіт на востраў непажаданы.

На мінулым тыдні прадстаўнік Мінабароны Кітая Тань Кэфэй паведаміў, што кітайскія вайскоўцы не будуць сядзець склаўшы рукі ў выпадку, калі Пеласі ўсё ж вырашыць адправіцца на Тайвань. Кітайскім бокам будуць прыняты рашучыя меры для спынення ўмяшання ва ўнутраныя справы краіны.

Праблема Тайваня ўзнікла ў 1949 годзе, калі на востраў збег пацярпелы паражэнне ў грамадзянскай вайне Чан Кайшы і яго прыхільнікі. Да 1980-х кантакты паміж астраўной правінцыяй і мацерыковым Кітаем практычна спыніліся.

Кіраўніцтва КНР стала ўзаемадзейнічаць з Тайванем пры пасрэдніцтве пекінскай Асацыяцыі развіцця адносін праз Тайваньскі праліў і тайбэйскага Фонду абменаў праз праліў з 1990-х гадоў.

Афіцыйны Пекін прытрымліваецца той пазіцыі, што Кітай з’яўляецца адзіным, а Тайвань – яго частка. У сувязі з чым неаднаразова заклікаў краіны Захаду не падтрымліваць кантакты з Тайбэм на афіцыйным узроўні.

ЗША выконваюць "прынцып аднаго Кітая" фармальна, на Тайвані няма афіцыйнага амерыканскага дыпламатычнага прадстаўніцтва. Але Штаты кантактуюць з кіраўніцтвам вострава, і, акрамя іншага, рэгулярна пастаўляюць туды ўзбраенні.