Паўмарафон, салют, бясплатныя экскурсіі: што чакае мінчан на Дзень горада

МІНСК, 6 жні – Sputnik. Святкаванне Дня горада ў беларускай сталіцы пачнецца ўжо 3 верасня, а кульмінацыяй 995-гадовага юбілею стане 10 верасня. Праграму Мінгарвыканкам абяцае насычаную.

Тэматычныя пляцоўкі вызначаны ў кожным раёне Мінска. Так, 3 верасня ў парках пройдуць сямейныя мерапрыемствы. Таксама ў гэты дзень можна бясплатна наведаць Белдзяржцырк – будзе дзень адчыненых дзвярэй.

З 5 па 11 верасня мінчан і гасцей сталіцы чакае шырокая і разнастайная праграма. Шэраг музеяў прапануюць бясплатна паглядзець іх экспазіцыі. Даведацца нешта новае пра сталіцу можна на экскурсіях па гістарычным цэнтры і знакавых мясцінах. Акрамя таго, новы адрэстаўраваны Музей горада Мінска (вул. Ракаўская, 17) пакажа тэматычную экспазіцыю.

Таксама ў сталіцы адкрыюць новы веламаршрут – "Дарогай памяці". А з 8 па 10 верасня на Кастрычніцкай плошчы будуць дэманстравацца дасягненні прамысловасці Мінска.

Сталічныя тэатры адчыняць дзверы для ўсіх ахвочых убачыць закуліссе і сустрэцца з акцёрамі і рэжысёрамі. У школах – тыдзень спорту.

У гэты дзень галоўныя ўрачыстасці разгорнуцца ў цэнтры горада. У Траецкім прадмесці будзе ўзноўлена атмасфера XIX стагоддзя – кірмашы, выставы, рамеснікі, фотазоны, музыканты і літаратурныя чытанні.

У Верхнім горадзе пройдзе фестываль беларускай кухні пад песні ансамбля "Сябры" з удзелам Анатоля Ярмоленкі. Пунктам збору моладзі стане парк "Перамога" – там абяцаюць цікавую пляцоўку.

Каля Палаца спорту – Міжнародны алімпійскі дзень. Спецыяльныя квэсты і інтэрактыўныя пляцоўкі запрашаюць аматараў ЗЛЖ.

А яшчэ непадалёк будуць спаборнічаць пажарныя – будзе вельмі відовішчна і захапляльна. Побач – інтэрактыўная пляцоўка ад ДАІ. Арганізатары абяцаюць шмат музыкі – ад усіх вядомых беларускіх выканаўцаў да гарачых кавер-груп.

У 23:00 каля Палаца спорту адбудзецца святочны салют.

Але на гэтым святкаванне юбілею сталіцы не скончыцца. Па традыцыі, 11 верасня пройдзе Мінскі паўмарафон – самае масавае спартыўнае мерапрыемства года.