Як вырабіць пячэнне ўручную, але ў прамысловых маштабах?

Так проста – зайсці ў краму, купіць любімае пячэнне і з’есці яго, абсалютна не задумваючыся, колькі працы можа быць укладзена ў яго вытворчасць. Мы абвыклі да таго, што ўсё робіць канвеер, але, аказваецца, у некаторых выпадках "машына" проста не здольна замяніць чалавека. Так і з печывам "Да падвячорка" - яго можна вырабіць толькі ўручную.

Карэспандэнты Sputnik пабывалі ў цэху ручной працы кандытарскай фабрыкі "Слодыч" і даведаліся, чаму іх пячэнне такое смачнае.

Здавалася б, нічога складанага, калі працэс ужо адладжаны. Але, як расказала начальнік змены Наталля Харытоненка, гэтую працу можа выканаць далёка не кожны.

Так што, калі адна з майстрых сыходзіць у адпачынак або на бальнічны, замяніць яе не так проста.

Набор асноўных інгрэдыентаў невялікі: для падрыхтоўкі пячэння "К полднику" спатрэбіцца мука, маргарын, яйкі і цукар. Інгрэдыенты закідваюць у цестамясільную машыну.

На стале вялікімі і цяжкімі скалкамі працаўніцы ўручную раскачваюць цеста. Дарэчы, іх прафесія называецца "Вытворца бісквітаў" - гучыць вельмі міла і апетытна.

На прадпрыемстве падзяліліся і сакрэтным інгрэдыентам. "Разыначка" гэтага пячэння – сыр. Пры запяканні ён пузырыцца і так застывае пры астыванні, а да здобнага смаку дадаецца смак сыру.

Сыр на кандытарскай фабрыцы размолваюць і кладуць у спецыяльнае сіта, з дапамогай якога ўручную размяркоўваюць па паверхні раскачанага цеста. Праўда, перад гэтым цеста змазваецца яечнай масай, і гэта яшчэ адзін сакрэт.

"Калі гэта не зрабіць, сыр не будзе трымацца на пячэнні. Гэта важны момант тэхналогіі", – растлумачылі ў цэху.

Затым кожнае пячэнне выразаецца з раскачанага пласта цеста формачкамі, і робіцца гэта зноў уручную.

Нарыхтоўкі з цеста выкладваюцца на бляху, а потым у справу ўступаюць пекары і адпраўляюць іх у печ.

Пакуецца пячэнне таксама ўручную і робіцца гэта максімальна беражліва. "Пасля выпечкі пячэнню трэба крыху пастаяць, каб яно астыла, і толькі потым яго можна пакаваць – як правіла, гэта робіцца ў наступную змену", - адзначыла Наталля Харытоненка.

Дарэчы, гэта не адзінае пячэнне, якое вырабляецца на прадпрыемстве ўручную – рукамі гэтых майстрых выпякаецца пячэнне ў выглядзе здобных сухарыкаў з разынкамі і сушанымі абрыкосамі пад назвай "Беларускі гасцінец" і пячэнне "Арэхавае з фундуком".

У краіну пячэння рэальна патрапіць – кандытарская фабрыка "Слодыч" запрашае дзяцей і дарослых да сябе на экскурсіі. Так што, калі вы да гэтага часу не ведаеце, колькі відаў пячэння выпускае гэта прадпрыемства, гэта трэба тэрмінова выправіць. Больш за тое, арганізатары экскурсіі абяцаюць паказаць працэс вырабу пячэння цалкам – ад замесу цеста і да яго фасоўкі, і ў дадатак – смачныя падарункі.

Гісторыя прадпрыемства пачалася ў 1905 годзе з невялікай кавярні і пякарні, якія перараслі потым у кандытарскую фабрыку "Жорж". У 1917 годзе яна стала Першай беларускай кандытарскай фабрыкай, а ў 1945-м – Мінскай бісквітнай. Цяперашнюю назву яна атрымала ўжо ў 1994 годзе.

Сёння кандытарская фабрыка "Слодыч" – гэта буйны вытворца на рынку кандытарскіх вырабаў Беларусі. У год тут выпускаецца 11 тысяч тон прадукцыі больш за 100 відаў – гэта не толькі пячэнне, але і цукеркі, пернікі, зефір і вафлі, выпуск якіх наладжаны на філіялах сталічнага прадпрыемства.

Прадукцыя фабрыкі экспартуецца ў больш як 18 краін.