МІНСК, 14 ліс – Sputnik. Беларусь плануе наладзіць серыйную мадэрнізацыю танка Т-72БМЭ з наступнага года, паведаміў кіраўнік беларускага Дзяржкамваенпрама Дзмітрый Пантус у эфіры тэлеканала СТБ.
Ён расказаў, што ёсць вельмі шмат эканамічна выгадных праектаў па мадэрнізацыі розных відаў тэхнікі. Многія з іх паспяховыя. Так, напрыклад, заканчваюцца выпрабаванні па мадэрнізацыі танка Т-72БМЭ.
"Наша мадыфікацыя, на мой погляд, вельмі паспяховая. Пачынаючы з наступнага года, мы серыйна будзем мадэрнізаваць гэтыя вырабы ў інтарэсах узброеных сіл Беларусі", - дадаў старшыня камітэта.
Пантус лічыць, што рашэнне аб мадэрнізацыі ўзбраення і тэхнікі трэба прымаць з улікам адразу некалькіх фактараў – эканамічнай мэтазгоднасці і тактыка-тэхнічных патрабаванняў, якія прад’яўляюць узброеныя сілы да таго ці іншага віду ўзбраення.
Сумесна з Расіяй
Старшыня Дзяржкамваенпрама таксама паведаміў, што Беларусь і Расія пры рэалізацыі сумесных праектаў у ваеннай сферы зробяць акцэнт на развіцці мікраэлектронікі і стварэнні электроннай кампанентнай базы.
Раней кіраўнік беларускага ўрада Раман Галоўчанка заявіў, што каля 200 мільёнаў долараў са сродкаў, якія расійскі бок выдзяляе на рэалізацыю сумесных праектаў па імпартазамяшчэнні, будуць накіраваны на праекты ў ваеннай сферы.
Як растлумачыў Пантус, асноўныя сродкі будуць накіраваны на развіццё мікраэлектронікі і стварэнне электроннай кампанентнай базы, бо цяпер і ў Беларусі, і ў Расіі "ёсць ад яе пэўная залежнасць".
"Акцэнты будуць накіраваны, мне здаецца, у гэтым напрамку", - дадаў ён.
Кіраўнік камітэта падкрэсліў, што сёння кааперацыйная работа беларускіх прадпрыемстваў ваенна-прамысловага комплексу "ў асноўным вядзецца з дружалюбнымі для Беларусі краінамі", а асноўным партнёрам краіны з’яўляецца Расія.
Таксама паводле слоў Пантуса, цяперашнія ўзброеныя канфлікты адбіваюцца і на стратэгіі беларускай ваеннай прамысловасці. Ён пацвердзіў, што пэўны ўплыў прысутнічае, таму Дзяржкамваенпрам сумесна з УС маніторыць існуючую сітуацыю.
"Мы шукаем новыя трэнды, новыя спосабы абароны ад таго ці іншага віду ўзбраення і ўносім карэкціроўкі ў нашу работу", - дадаў ён.
Новыя напрамкі
Пантус паведаміў, што з’яўляецца яшчэ адзін напрамак працы камітэта, ён датычыцца сродкаў барацьбы з беспілотнікамі. І ў гэтым напрамку, паводле яго слоў, Беларусь ужо дастаткова сур’ёзна атрымала поспех.
"На сёння пэўныя ўзоры з’яўляюцца топавымі і на сусветным рынку ўзбраення. Лінейка радыёэлектронных сродкаў падаўлення "Гроза" вельмі шырокая, вельмі актуальная і карыстаецца пэўным попытам", - сказаў ён.
Старшыня падкрэсліў, што Дзяржкамваенпрам робіць усё магчымае, каб Узброеныя сілы штогод атрымлівалі максімальную колькасць самых сучасных сродкаў па ўсіх напрамках.
"Практычна штогод мы рэалізуем у ініцыятыўным парадку, а нешта і сумесна з Мінабароны, больш за 200 доследна-канструктарскіх работ па стварэнні розных відаў узбраенняў, іх мадэрнізацыі. Гэта работа бесперапынна, і ў сярэднім ад 10 да 20 новых відаў вырабаў становяцца штогод на ўзбраенне", - дадаў Пантус.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь
Таксама на Sputnik:
Пантус: Беларусь уваходзіць у топ-20 краін, якія экспартуюць узбраенне і тэхніку
Прамыя канкурэнты HIMARS: як гучаць беларускія "Паланэзы" – відэа
Новыя ракеты ўласнай вытворчасці выпрабуюць у Беларусі