Навучальна-баявыя цэнтры створаць Беларусь і Расія: як яны будуць працаваць

МІНСК, 24 сту – Sputnik. Беларусь і Расія створаць вучэбна-баявыя цэнтры, адпаведны праект пагаднення апублікаваны на афіцыйным інтэрнэт-партале прававой інфармацыі РФ.

Ствараць такія цэнтры ў абедзвюх краінах будуць упаўнаважаныя органы, гэта значыць міністэрствы абароны. Паўсядзённай дзейнасцю кантынгентаў будзе кіраваць аб’яднанае камандаванне.

Асабісты склад накіроўваючага боку пры гэтым павінен паважаць суверэнітэт і выконваць законы прымаючага боку. Але зарплаты гасцей будуць вызвалены ад падаткаў краіны-гаспадыні за выключэннем ускосных, якія ўключаны ў цэны тавараў і паслуг (напрыклад, ПДВ).

Расійскія вайскоўцы, як і беларускія, будуць працягваць насіць знакі адрознення сваіх войск, калі кіраўніцтва не прыме "іншае ўзгодненае рашэнне".

На транспарце, які накіруе Расія ў цэнтры на тэрыторыі Беларусі (і наадварот), рэгістрацыйныя знакі застануцца ранейшыя. Іх не трэба будзе мяняць на мясцовыя. Тое ж самае тычыцца вадзіцельскіх праў. Не трэба будзе здаваць нейкія мясцовыя экзамены і праходзіць пацвярджэнні.

Бок, які прымае, будзе бясплатна забяспечваць гасцей памяшканнямі. Таксама бясплатныя і харчаванне асабовага складу, гаруча-змазачныя матэрыялы, інжынерна-аэрадромнае забеспячэнне, медабслугоўванне. Але рамонтам узбраення і тэхнікі займаецца тая армія, якой яны належаць.

Ваенныя могуць прымяняць зброю для сумеснай баявой падрыхтоўкі, пры баявым і вопытна-баявым дзяжурстве. Прычым пагадненне абвяшчае, што асабовы склад накіроўваючага боку на тэрыторыі прымаючага боку не атрымлівае права на пастаяннае пражыванне.

Дакумент набудзе моц, калі адзін з бакоў атрымае апошняе пісьмовае апавяшчэнне аб завяршэнні ўнутраных працэдур па ратыфікацыі. Кожны з бакоў можа спыніць дзеянне пагаднення, але павінен аб гэтым папярэдзіць пісьмова і не пазней як за паўгода да спынення.

На гэты момант Беларусь і Расія сканцэнтравалі на беларускай тэрыторыі сумесную групоўку войск. У яе ўваходзіць беларуская армія, а з расійскага боку, паводле афіцыйных звестак, прыбылі каля дзевяці тысяч вайскоўцаў. Таксама ў рэспубліку перадыслацыравана ваенная тэхніка, у тым ліку гэта авіяцыя (Су-34, Мі-8, Мі-24, А-50 і іншыя паветраныя судны).

Разгортванне сумеснай групоўкі пачалося па рашэнні прэзідэнтаў Расіі і Беларусі Уладзіміра Пуціна і Аляксандра Лукашэнкі восенню 2022 года. Цяпер ідзе падрыхтоўка і зладжванне беларускіх і расійскіх падраздзяленняў на тэрыторыі Беларусі.