Палескія зубры: зазірнулі на абед да тых, хто жыве на волі – фота

Засваенне зубрамі тэрыторыі запаведніка адбываецца натуральным шляхам, без умяшання чалавека.

Убачыць барацьбу двух зуброў – дастаткова рэдкае відовішча. Але па-сапраўднаму яны ўступаюць у сутычку падчас гону, тады зямля дрыжыць пад іх капытамі.

У маладых зуброў прыгожая здаровая шэрсць, якая ільсніцца на сонейку.

У некаторых нават сімпатычная шавялюра: такія кучаравінкі толькі ў Васілісы, так ласкава заве самку зубра наглядчык гадавальніка, куды жывёлы прыходзяць на падкорм.

Рогі не толькі для прыгажосці – з іх дапамогай заваёўваюць аўтарытэт.

Калі ў зубра вялікі горб, масіўная пярэдняя часць і густая шэрсць, то гэта адназначна бык.

Самкі не такія масіўныя і грозныя, але гэта не перашкаджае ім быць галоўнымі – у зуброў матрыярхат.

За сезон (з восені па вясну) зубры з’ядаюць 80 тон сена.

Падкормліваюць зуброў з 1 лістапада па 1 красавіка.

У меню: аўсяная мука, сена і павараная соль. Вада – у вадаёме, які выкапалі спецыяльна для жывёл.

Дарэчы, вады аднаму зубру трэба 40 літраў за суткі.

Зубры – не агрэсіўныя жывёлы. Калі чалавек сустрэнецца з імі ў лесе, тое можа не баяцца: звяры не стануць нападаць першыя. Аднак калі паблізу знаходзіцца малы або жывёла адчуе пагрозу, то адпор будзе жорсткі.

Летам зубры ядуць лісце, кару дрэў, парасткі раслін і траву. Любімы ласунак – морква. Агароднінай часам падкормліваюць жывёл леснікі.

Пэўна, немагчыма ўстаяць перад такім позіркам. Тут не толькі морквай пачастуеш, але і сваю пайку аддасі.

Ад сонца жмурацца не толькі людзі, зубры ў такія моманты выглядаюць вельмі міла.

Вясновае сонца можа так размарыць, што даводзіцца падпіраць бакамі пень, каб не зваліцца.

На лета жывёлы разбіваюцца на дробныя групы па 5-6 галоў, правадыр – самка.

На зіму зубры аб’ядноўваюцца ў статак са сваёй іерархіяй: спачатку да кармушак з кормам падыходзяць старэйшыя аўтарытэтныя самкі і самцы, толькі потым маладыя і старыя асобіны.

Спецыялісты адзначаюць, што ў некаторых самак збіты біялагічныя рытмы: яны прыносяць зубраня позняй восенню, калі ўжо халадае. Даводзіцца падкладаць пабольш сена, каб малыя не змерзлі.

У мінулым годзе ў Палескім дзяржаўным радыяцыйна-экалагічным запаведніку нарадзілася 22 зубраня.

Зубры жывуць да 25 год, на волі яшчэ менш. Гэта азначае, што ўсе зубры, якія жывуць у заказніку, нарадзіліся тут. Бо першых зуброў прывезлі з Белавежскай пушчы 27 гадоў таму.