Мінабароны РФ расказала аб наступствах выкарыстання снарадаў з уранам

МІНСК, 24 сак – Sputnik. Наколькі небяспечныя боепрыпасы са збедненым уранам, расказалі ў Мінабароны РФ падчас брыфінгу па радыяцыйнай, хімічнай і біялагічнай абароне.

Як паведаміў начальнік войск РХБА расійскіх Узброеных сіл Ігар Кірылаў, пасля таго, як снарад ударыў па цэлі, узнікне воблака, якое змяшчае ізатоп уран-238 і яго аксіды, што могуць істотна ўплываць на здароўе чалавека. Радыёактыўны пыл будзе назапашвацца ў нырках, касцяной тканцы і печані, што можа прывесці да змены ўнутраных органаў і сур’ёзных паталогій – аж да анкалогіі.

Генерал-лейтэнант падкрэсліў, што злучэнні збедненага ўрану пасля выкарыстання снарадаў могуць заставацца ў глебе вельмі доўгі час, негатыўна ўплываючы не толькі на людзей, але і жывёл, а таксама сельгаскультуры.

Прадстаўнік Мінабароны нагадаў, як роўна 14 гадоў таму ў 1999 годзе, амерыканскія вайскоўцы пачалі бамбёжку Югаславіі. Было выпушчана каля 40 тысяч снарадаў з больш чым 15 тонамі збедненага ўрану. Пацярпела мірнае насельніцтва.

Такія ж снарады выкарыстоўваліся ЗША падчас іракскай вайны 2003-2004 гадоў. Паводле слоў Кірылава, было ўжыта не менш як 300 тон збедненага ўрану. У выніку радыяцыйнае становішча ў іракскім горадзе Фалуджа было "значна горш, чым у Хірасіме і Нагасакі" ў 1945-м.

Пасля гэтага ў Іраку істотна вырасла захворванне на рак – з 40 да 1 600 выпадкаў на 100 тысяч насельніцтва. У Югаславіі таксама адзначалася павелічэнне колькасці пацыентаў з анкалогіяй на 25%.

Начальнік войск радыяцыйнай, хімічнай і біялагічнай абароны УС РФ адзначыў, што боепрыпасы, якія змяшчаюць радыеактыўныя ізатопы, ва ўзброеных канфліктах ужывалі толькі краіны НАТА.

Заявы ў Мінабароны РФ наконт небяспекі снарадаў са збедненым уранам былі зроблены ў сувязі з намерамі Вялікабрытаніі паставіць такія боепрыпасы Украіне. Раней аб гэтым паведаміла намеснік міністра абароны краіны Аннабэль Голдзі. Пры гэтым у ЗША адзначылі, што яны не будуць адпраўляць уранавыя снарады ў Кіеў.

Прэзідэнт Расіі Уладзімір Пуцін з гэтай нагоды заявіў, што РФ будзе вымушана рэагаваць, калі калектыўны Захад пачне прымяняць зброю з ядзерным кампанентам.

Выказванні Лондана пракаменціраваў і беларускі лідар. Аляксандр Лукашэнка папярэдзіў, што як толькі брытанскія боепрыпасы будуць узрывацца на пазіцыях расійскіх войск, "адказ будзе страшным, для ўсёй планеты ўрокам".