МІНСК, 2 мая – Sputnik. Адноўлены рух цягнікоў на перагоне Унеча – Расуха ў Бранскай вобласці, дзе сышлі з рэек вагоны, паведаміла прэс-служба Расійскай чыгункі (РЧ) у афіцыйным Telegram-канале.
Раней стала вядома, што выбуховае прыстасаванне спрацавала на чыгуначных пуцях ва Унецкім раёне Бранскай вобласці, у выніку сышоў з рэек лакаматыў беларускага грузавога саставу.
Як паведаміў губернатар Бранскай вобласці Аляксандр Багамаз, у выніку надзвычайнага здарэння ніхто не пацярпеў.
"У 4:53 па маскоўскім часе (адпавядае мінскаму - Sputnik) РЧ адкрылі рух цягнікоў на перагоне Унеча – Расуха, парушаны 1 мая з-за сходу рухомага саставу ў выніку незаконнага ўмяшання ў работу чыгункі", - гаворыцца ў паведамленні.
У прэс-службе Расійскай чыгункі ўдакладнілі, што для аднаўленчых работ прыцягваліся каля 300 чыгуначнікаў і тры аднаўленчыя цягнікі.
Акрамя таго, прыйшлося замяніць каля 100 метраў чыгуначнага палатна.
Беларусы вернуцца дадому
Старшыня Гомельскага аблвыканкама Іван Крупко і губернатар Бранскай вобласці Аляксандр Багамаз абмеркавалі па тэлефоне падрабязнасці гэтага здарэння, паведамляецца ў Telegram-канале "Гомельшчына афіцыйна".
Асноўная тэма гутаркі – беларуская лакаматыўная брыгада.
Кіраўнік Бранскай вобласці пацвердзіў, гомельскі экіпаж не пацярпеў, ён у поўным парадку. Вярнуцца дадому супрацоўнікі БЧ змогуць толькі пасля таго, як будуць праведзены ўсе неабходныя следчыя мерапрыемствы. Але, як запэўніў Багамаз, здарыцца гэта "зусім хутка".
Крупко ў сваю чаргу падкрэсліў, што беларускі бок гатовы аказаць любую дапамогу, неабходную для расследавання здарэння.
Што адбылося
Як удакладнілі раней у прэс-службе беларускага Мінтранса, грузавы цягнік №2528 фарміравання БЧ сышоў з рэек у Бранскай вобласці пасля таго, як спрацавала неўстаноўленае выбуховае прыстасаванне.
Надзвычайнае здарэнне адбылося ў панядзелак, у 10:17 на 136-м км перагону Унеча – Расуха. Цягнік №2528 накіраваўся са станцыі Гомель прызначэннем на станцыю Бранск.
Выбуховае прыстасаванне спрацавала за 50 метраў ад грузавога саставу, у якім было 78 вагонаў, у выніку з рэек сышлі восем з іх. Лакаматыўная брыгада не пацярпела.
На месца здарэння акрамя аднаўленчага цягніка выехалі таксама прадстаўнікі Гомельскага аддзялення БЧ, яны прымуць удзел у расследаванні здарэння.
Кіраўнік Следчага камітэта Расіі Аляксандр Бастрыкін даручыў узбудзіць крымінальную справу па факце выбуху на чыгуначным палатне.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Чытайце таксама:
Выбуховая прылада спрацавала на чыгунцы ў Бранскай вобласці
ФСБ прадухіліла замах на мэра Горлаўкі, які рыхтавала СБУ
Пуцін назваў тэрактам тое, што адбылося ў Бранскай вобласці