Лідзіруе Эрдаган: у Турцыі падлічылі галасы на выбарах прэзідэнта

МІНСК, 15 мая – Sputnik. Падлік галасоў на прэзідэнцкіх выбарах у Турцыі завершаны, апрацаваны бюлетэні 100% скрынь для галасавання, паведамляе дзяржтэлеканал TRT Haber.

Па выніках выбараў дзеючы кіраўнік дзяржавы Рэджэп Таіп Эрдаган набраў 49,24% галасоў (больш за 26 мільёнаў выбаршчыкаў).

Яго асноўны сапернік Кемаль Кылычдараглу – 45,06% (больш за 23,8 мільёна выбаршчыкаў).

За Сінана Агана ад кааліцыі Ata прагаласавалі больш за 2,7 мільёна чалавек.

Несапраўднымі прызнаны турэцкім выбаркамам больш за мільён бюлетэняў.

Канчатковыя вынікі аб’явіць Вышэйшая выбарчая камісія Турцыі. Яна ж прыме рашэнне наконт другога тура выбараў.

Раней Эрдаган заявіў, што верыць у шанс перамагчы ў першым туры прэзідэнцкіх выбараў.

Кылычдараглу ў сваю чаргу сказаў, што ў дзеючага кіраўніка дзяржавы не атрымаецца стаць прэзідэнтам па выніках першага тура.

Нагадаем, што ў адпаведнасці з заканадаўствам краіны, калі ніводзін з кандыдатаў не набірае больш за 50% галасоў, турэцкіх выбаршчыкаў чакае другі тур галасавання, які папярэдне прызначаны на 28 мая.

Выбары ў краіне адбыліся напярэдадні. Асноўным апанентам дзеючага прэзідэнта Эрдагана – адзінага кандыдата ад "Рэспубліканскага альянсу" – з’яўляецца адзіны кандыдат ад апазіцыйнага "Народнага альянсу" Кылычдараглу.

Таксама ў выбарах удзельнічаў кандыдат ад альянсу Ata Сінан Аган.

Чацвёрты кандыдат – лідар партыі Memleket Мухарэм Інджы – за тры дні да выбараў аб’явіў аб зняцці сваёй кандыдатуры, аднак яго прозвішча засталося ў бюлетэнях.

Яўка на выбарах перавысіла 88,8%.

Афіцыйныя вынікі будуць апублікаваны 19 мая.

У нядзелю таксама адбылося галасаванне на выбарах у парламент.

Па папярэдніх даных, цяперашняя кіруючая партыя набрала 40,3% галасоў (287 месцаў у парламент з 600). У кааліцыі з кіруючай партыяй ішла і "Партыя нацыяналістычнага руху" ў яе 57,1% галасоў і амаль 350 мандатаў. Апазіцыйны "Народны альянс" атрымаў амаль 29% галасоў, "Альянс працы і свабоды" – больш за 8%.