МІНСК, 17 мая – Sputnik. Ужо ў гэтым месяцы ў Башкортастан плануюць прывезці першую партыю беларускіх зуброў, другую – у пачатку восені, паведаміў у мультымедыйным прэс-цэнтры Sputnik прадстаўнік Башкортастана пры расійскім гандлёвым прадстаўніцтве ў Беларусі Канстанцін Клімін.
"Праведзена вялікая работа, падрыхтавана ўся дакументацыя па патрабаваных нормах утрымання чырвонакніжных жывёл. Навуковая супольнасць падрыхтавала план дзеянняў, якім чынам можна было б адаптаваць папуляцыю беларускіх зуброў у Башкортастане. Таксама выбрана месца – гэта Мурадымаўская цясніна", - расказаў Клімін.
Ён адзначыў, што ў маі завязуць у рэспубліку пяць асобін зуброў, а ў верасні – трынаццаць. Расійскі бок таксама разлічвае, што далейшае скрыжаванне дапаможа дадаткова вывесці той від, які будзе больш адаптыўны да ўмоў сярэдняй паласы Расіі.
Нагадаем, Беларусь пагадзілася перадаць Башкортастану некалькі асобін зуброў у сярэдзіне студзеня, калі ў Мінск з візітам прыязджаў кіраўнік гэтага рэгіёна Радый Хабіраў.
Пазней у мультымедыйным прэс-цэнтры Sputnik Беларусь Хабіраў расказаў, што размова аб зубрах "цалкам выпадкова зайшла ў кіраўніцтве справамі прэзідэнта".
"Мы прапанавалі нейкую частку асобін, адпаведна, узяць на развіццё, на прыплод у Башкортастан", - растлумачыў ён.
Аказалася, што гэта магчыма. Напрыклад, зуброў ужо адпраўлялі ў Калужскую вобласць. Папярэднія кансультацыі паказалі, што башкірскія ўмовы падыходзяць беларускім волатам.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Таксама на Sputnik:
Беларусь распрацоўвае даступныя туры ў Башкортастан
Экспарт тавараў з Беларусі ў Татарстан вырас на 153% – Пархомчык
З усмешкамі і падарункамі: першы прамы рэйс з Уфы сустрэлі ў Мінску