МІНСК, 12 ліп – Sputnik. Расія і Беларусь плануюць пачаць стварэнне медыяхолдынга Саюзнай дзяржавы ўжо ў 2023 годзе, паведамляе ТАСС са спасылкай на прэс-службу Мінлічбы РФ.
Пры гэтым у расійскім ведамстве адзначылі, што па некаторых пытаннях патрэбна рашэнне Вышэйшага дзяржсавета Саюзнай дзяржавы, пасяджэнне якога запланавана на 2024 год. Дэталей рэфармавання СМІ дзвюх дзяржаў у міністэрстве не ўдакладнілі.
У Мінлічбы РФ таксама заявілі, што профільныя міністэрствы дзвюх краін ужо ўзгаднілі план стварэння медыяхолдынга, але па некаторых аспектах гэтай рэформы ў медыя патрабуюцца пазіцыі іншых органаў дзяржаўнай улады.
Напярэдадні міністр інфармацыі Беларусі Уладзімір Пярцоў заявіў, што прадстаўнікі РФ і Беларусі прапрацавалі ўжо дэталёвы план стварэння медыяхолдынга.
Паводле слоў беларускага міністра, "гэта будзе адзіная медыякампанія, якая аб’яднае ўсе рэсурсы Саюзнай дзяржавы". "Яна будзе нацэлена на прасоўванне інфармацыйнага парадку дня Саюзнай дзяржавы ў нашых краінах, паколькі гэта тэма ўсё больш і больш запатрабавана", - цытуе кіраўніка ведамства выданне "СБ. Беларусь сегодня".
Раней у сакавіку гэтага года беларускія парламентарыі выказвалі занепакоенасць засакрэчанасцю стварэння саюзнага медыяхолдынга. Тады на пасяджэнні профільнай камісіі Парламенцкага сходу прагучала інфармацыя, што засталося тры месяцы да заканчэння працы па стварэнні медыяхолдынга і што беларускі бок – міністэрства інфармацыі – адправіў свае прапановы, і расійскае профільнае ведамства іх вывучае.
Таксама прагучала інфармацыя аб тым, што пытанні стварэння і канцэпцыю саюзнага холдынгу абмеркавалі ўжо на ўзроўні адміністрацыі прэзідэнтаў дзвюх краін.
У пачатку красавіка на пасяджэнні Вышэйшага дзяржсавета Саюзнай дзяржавы Аляксандр Лукашэнка зноў нагадаў аб неабходнасці мець сур’ёзны саюзны медыяхолдынг.
"Трэба ствараць гэты медыяхолдынг. Калі хочам, каб парадак дня гучаў – трэба ствараць, не прыклейваючы яго да іншых арганізацый. Пра гэта мы дамовіліся. Але гэта не адразу робіцца", - заявіў беларускі лідар Лукашэнка на пасяджэнні Вышэйшага дзяржаўнага савета, якое прайшло 6 красавіка ў Крамлі.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Чытайце таксама:
Крутой распавёў, якім будзе кантэнт медыяхолдынга Саюзнай дзяржавы
Лукашэнка выказаўся аб неабходнасці стварыць саюзны медыяхолдынг
Сенатар Паўлава: Мінск і Масква павінны паскорыцца па стварэнні медыяхолдынга