Некаторым школьнікам выдадуць спецыяльныя праязныя з 1 верасня

МІНСК, 21 жні – Sputnik. Бясплатны праязны для некаторых школьнікаў і навучэнцаў каледжаў Мінска будзе ўведзены з 1 верасня, расказаў дырэктар прадпрыемства "Сталічны транспарт і сувязь" Юрый Супрановіч.

Нагадаем, усе школьнікі Мінска і Мінскага раёна могуць з 1 верасня па 30 чэрвеня бясплатна ездзіць у гарадскім транспарце на падставе даведкі ці вучнёўскага білета. Аднак, "каб прывіваць ім разуменне аказання транспартнай паслугі", для навучэнцаў зробяць спецыяльныя заламініраваныя праязныя.

У эксперыменце, мэтай якога стане аналіз колькасці перавезеных пасажыраў і ўлік пасажыраў, якія маюць права бясплатнага праезду, прымуць удзел таксама ветэраны ВАВ, героі Беларусі і СССР, афганцы і інваліды. Яны далучацца да пілотнага праекта з 1 кастрычніка.

А з 1 студзеня 2024 года эксперымент па аплаце праезду адпрацуюць на ўсіх ільготных катэгорыях грамадзян.

Нагадаем, што ў беларускай сталіцы з 16 жніўня адбылася аптымізацыя аплаты праезду – з’явіўся адзіны праязны білет на ўсе віды транспарту па адной цане. Ён каштуе 51 рубель і 5 капеек на адзін месяц. Скарыстацца ім можна як на наземных відах транспарту – аўтобусе, тралейбусе, трамваі – так і ў метро.

Раней за 51 рубель і 5 капеек можна было купіць праязны на месяц толькі на два наземныя віды транспарту.

Супрановіч расказаў, што на гэты момант у Мінску 2 111 рухомых адзінак грамадскага транспарту. З іх 93 электробусы, 132 вагоны трамваяў, 316 вагонаў метро на трох лініях (у гадзіны-пік), 712 тралейбусаў (251 з павялічаным аўтаномным ходам) і 1 174 аўтобусы. У бягучым годзе для горада будзе куплена сем электробусаў.