МІНСК, 12 вер – Sputnik. Еўразійская эканамічная камісія прапануе стварыць сучасныя і надзейныя сістэмы разлікаў паміж краінамі ЕАЭС і БРІКС, паведаміў старшыня калегіі ЕЭК Міхаіл Мясніковіч, выступаючы на сесіі "ЕАЭС – БРИКС: роль в формировании нового многополярного мира" на VIII Усходнім эканамічным форуме ў аўторак.
Ён падкрэсліў, што ўзаемны тавараабарот дзяржаў БРІКС і Еўразійскага эканамічнага саюза расце. Так, па выніках першага паўгоддзя 2023-га ён дасягнуў 150 мільярдаў долараў. Пры гэтым краіны ЕАЭС за гэты перыяд экспартавалі сваім партнёрам у БРІКС на 15% прадукцыі больш да ўзроўню мінулага года.
"Гэтыя таварныя патокі, перакананы, будуць расці, патрэбны сучасныя і надзейныя сістэмы разлікаў", - сказаў Мясніковіч.
У сувязі з гэтым ён прапанаваў мінфінам і цэнтрабанкам краін-членаў ЕАЭС прапрацаваць гэтае пытанне да наступнага саміту аб’яднання ў Казані ў 2024 годзе.
БРІКС і новыя тавары
Адзначыўшы, што ўнутраны рынак ЕАЭС поўнасцю забяспечаны асноўнымі таварамі за кошт уласнай вытворчасці, кіраўнік ЕЭК нагадаў, што цяпер ідзе работа над паляпшэннем якасных паказчыкаў, у прыватнасці над павышэннем прадукцыйнасці працы і зніжэннем матэрыяла- і энергаёмістасці. З гэтага вынікае, што трэба ўкараняць сучасныя тэхналогіі, дадаў ён.
"Дзяржавы ЕАЭС маюць сур’ёзныя кампетэнцыі, але мяркуем, што ўдзел кампаній з краін БРІКС можа быць узаемавыгадным і паскорыць працэсы вытворчасці новых тавараў", - сказаў Мясніковіч і запрасіў кампаніі з краін БРІКС, у прыватнасці Кітая і Індыі, да сумесных праектаў у станкабудаванні, буйнатанажнай хіміі, фармацэўтыцы і шэрагу іншых.
Кіраўнік ЕЭК таксама заявіў, што трэба больш актыўна ўкараняць лічбавыя транспартныя платформы, лічбавізацыю дакументаў для выканання мытных працэдур. У рамках ЕАЭС гэтыя пытанні вырашаюцца, падкрэсліў ён, аднак "з трэцімі краінамі цяжэй".
Выступаючы на сесіі, Мясніковіч нагадаў і аб прапанове прэзідэнта Беларусі Аляксандра Лукашэнкі правесці саміт краін ЕАЭС, БРІКС і ШАС, які мог бы даць старт рэальным праектам супрацоўніцтва. Гэтую прапанову, адзначыў кіраўнік Еўразійскай эканамічнай камісіі, можна было б уключыць у дакументы па выніках Усходняга эканамічнага форуму.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"
Таксама на Sputnik:
Мінск прапануе правесці адзіны саміт БРІКС-ЕАЭС-ШАС
Развіццё сувязей з ЕАЭС і БРІКС з’яўляецца для Беларусі прыярытэтам – пасол у РФ
Масква гатова садзейнічаць уступленню Беларусі ў БРІКС