85-годдзе кампазітара Лучанка адзначылі ў Белдзяржфілармоніі

У сераду, 27 верасня, у Беларускай дзяржаўнай філармоніі адбыўся гала-канцэрт "Неспакойнае сэрца", прысвечаны 85-годдзю Ігара Лучанка. Сапраўдны падарунак усім, хто захапляецца яго творчасцю, падрыхтаваў Нацыянальны акадэмічны народны аркестр Беларусі імя І. Жыновіча.

Калумніст Sputnik Яўген Агурцоў-Кржыжаноўскі пабываў на канцэрце і расказаў, як гэта было.

Пра лішні білецік у філармонію пыталіся ўжо ў метро, ​​Лучанок па-ранейшаму "ў трэндзе". Але ў фае цэнтрам увагі стала сям’я кампазітара: жонка Аляксандра, дачка Святлана і сын Андрэй. Людзі дарылі ім кветкі, абдымалі, нешта казалі.

У зале, адкрываючы канцэрт, аўтар гэтага праекта і вядучая Вольга Брылон акцэнтавала ўвагу на сям’і, а таксама на тым, што Лучанок свой творчы шлях пачаў менавіта ў ансамблі ў якасці цымбаліста, а сам канцэрт – падарунак сям’і, мінчанам і гасцям сталіцы.

Песні Лучанка за час яго кар’еры выконвалі знакамітыя "Песняры", Іосіф Кабзон, Сафія Ратару, Валянціна Талкунова, Марыя Пахоменка, Леў Лешчанка, Эдуард Хіль, Віктар Вуячыч, Яраслаў Еўдакімаў, "Сябры" і "Верасы", становячыся лаўрэатамі Усесаюзнага тэлевізійнага конкурсу "Песня года".

Музыка кампазітара станавілася візітнай карткай музычнай культуры Беларусі – яе пропускам у свет высокага мастацтва. Песні народнага артыста СССР кампазітара Ігара Лучанка вось ужо больш за 50 гадоў з’яўляюцца музычна-мастацкімі сімваламі рэспублікі. За гэтыя гады шмат разоў яны станавіліся паўнамоцнымі прадстаўнікамі і сяброўскімі пасланцамі нашай Радзімы ў самых розных кутках планеты.