Беларусь заняла другое месца ў ЕАЭС па таннасці збожжа

МІНСК, 28 вер – Sputnik. Сярэдняя цана за тону пшаніцы ў Беларусі склала ў жніўні 463 беларускія рублі, вынікае з даных Еўразійскай эканамічнай камісіі.

У эквіваленце кошт складае 147 долараў ці 13 986 расійскіх рублёў. У абедзвюх валютах гэта другі па таннасці паказчык у ЕАЭС.

Самая танная пшаніца – расійская. Тона, паводле інфармацыі за жнівень, каштуе 120 долараў або 11 411 расійскіх рублёў.

З ячменем такая ж сітуацыя. Як у доларах, так і ў расійскіх рублях другая па таннасці цана – у Беларусі. Тона абыдзецца ў сярэднім у 148 долараў ці 14 091 расійскіх рублёў.

Ячмень з Расіі каштуе 98 долараў ці 9 363 расійскіх рублёў.

Найбольш танная бульба таксама ў Расіі – 176 долараў за тону або 16 771 расійскіх рублёў. Беларусь тут на чацвёртым месцы (294 долараў), на другім і трэцім Казахстан (259 долараў) і Арменія (284).

Капуста таннейшая ў Беларусі (218), затым ідуць Расія (277), Казахстан (369), Арменія (440) і Кыргызстан (605). Найбольш танная морква таксама на беларускім рынку – 134 долары за тону. У Казахстане – 207, у Расіі – 255, у Кыргызстане – 393, у Арменіі – 507.

Бурак каштуе менш за ўсё ў Расіі – 171 долар. У Беларусі другое месца – 247, а самая высокая цана на гэты тавар у Арменіі – 505. Лук рэпчаты ў Беларусі далёка не самы даступны. Тона каштуе 407 долараў, тады як у Кыргызстане – 234, Расіі – 266, Казахстане – 282.

Самыя танныя агуркі і таматы – у Кыргызстане – 347 і 299 долараў адпаведна. Найбольш высокія цэны – у Расіі (659 і 867 долараў). Беларусь па таннасці таматаў займае другую пазіцыю – 346 долараў, а па агурках – чацвёртае месца (511).

Агульны гадавы індэкс цэн на сельскагаспадарчую прадукцыю ў жніўні ў ЕАЭС склаў мінус 3%. Гэта значыць, у гэтым сектары адбылася дэфляцыя. Аднак у жывёлагадоўлі цэны, у асноўным, раслі, і гадавая інфляцыя склала 4,3%. Хаця ёсць выключэнні: у Арменіі – мінус 8%, у Беларусі – мінус 0,3%.

Калі параўноўваць цэны вытворцаў у апошні месяц лета са снежнем мінулага года, то карціна падобная. Агульнае зніжэнне склала 2,4%, у тым ліку ў раслінаводстве за гэты перыяд дэфляцыя склала 8%, але ў жывёлагадоўлі цэны выраслі на 1,3%.