Беларусь прыпыніла дзеянне пагаднення з Украінай аб перасяленцах

МІНСК, 5 кас – Sputnik. Кіраўнік Беларусі Аляксандр Лукашэнка падпісаў закон, якім прыпыніў дзеянне пагаднення з Украінай аб перасяленцах, якое дзейнічала 20 гадоў, дакумент №304-З ад 2 кастрычніка апублікаваны ў чацвер на Нацыянальным прававым інтэрнэт-партале.

Гэта пагадненне паміж Мінскай і Кіевам было падпісана ў беларускай сталіцы больш як 20 гадоў таму – 19 сакавіка 2003 года.

У дакуменце таксама адзначаецца, што беларускі парламент прыняў і адобрыў гэты закон 19 верасня гэтага года.

Разам з тым прыпыненне дзеяння гэтага пагаднення ніяк не паўплывае на пераезд перасяленцаў з Украіны і не пагоршыць становішча тых украінцаў, якія ўжо жывуць у Беларусі, таму што ўсе пытанні рэгулююцца нацыянальным заканадаўствам.

У апошні час на фоне расійскай спецаперацыі Кіеў рэгулярна заяўляе аб выхадзе з шэрага пагадненняў з Беларуссю, у сваю чаргу Мінск прадпрымае аналагічныя рашэнні.

Так, Беларусь спыніла дзеянне пагаднення з Украінай аб маладзёжнай палітыцы. Таксама спынена супрацоўніцтва дзвюх краін у сферы тэхнічнай абароны інфармацыі.

Былі разарваны дагаворы аб гарантыях у галіне пенсіённага забеспячэння, у галіне авіяцыйнага пошуку і выратавання, падатковае пагадненне.

У пачатку жніўня беларускі ўрад прыняў рашэнне разарваць яшчэ адно пагадненне, падпісанае раней з украінскім Кабінетам міністраў – аб умовах і парадку абмену жылых памяшканняў.

Пазней Мінск прыпыніў дзеянне яшчэ двух міжурадавых дагавораў з Украінай – аб прынцыпах супрацоўніцтва ў сферы сувязі і аб ваенна-тэхнічным супрацоўніцтве.

Акрамя таго, беларускі бок спыніў дзеянне пагадненняў у частцы ветэрынарнай медыцыны і супрацоўніцтва ў галіне каранціну раслін.