Беларусам будуць прыходзіць "пісьмы шчасця" з Расіі

МІНСК, 25 кас – Sputnik. Савет Федэрацыі РФ адобрыў закон аб ратыфікацыі пагаднення з Беларуссю аб узаемным прызнанні і выкананні рашэнняў па справах аб адміністрацыйных правапарушэннях у галіне дарожнага руху.

Расійскія парламентарыі ратыфікавалі дакумент на пасяджэнні 25 кастрычніка. Нагадаем, раней пагадненне аб узаемным прызнанні штрафаў за парушэнні ПДР адобрыла Дзярждума РФ.

Мяркуецца, што пасля ўступлення закона ў сілу (яго яшчэ таксама павінен ухваліць прэзідэнт Расіі Уладзімір Пуцін) кантроль за выкананнем аўтамабільных штрафаў прыкметна спросціцца.

Такім чынам, ДІБДР Расіі і ДАІ Беларусі будуць абменьвацца інфармацыяй аб парушальніках ПДР – у тым ліку тых, чые транспартныя сродкі трапілі ў поле зроку дарожных камер. Штрафы аўтаўладальнікам будуць прыходзіць па пошце.

Аплата пастаноў будзе рабіцца ў нацвалюце краіны, на тэрыторыі якой выконваецца рашэнне – па афіцыйным курсе мясцовага Цэнтрабанка. Выплачаны штраф будзе паступаць у даход краіны пражывання парушальніка. Аўтаўладальнікі маюць права абскардзіць вынесенае рашэнне ў парадку, устаноўленым заканадаўствам той краіны, у якой было ўчынена правапарушэнне.

Наладзіць паўнавартасны кантроль за замежнікамі, якія парушаюць ПДР, уладам абедзвюх краін пакуль што не ўдалося. Гэта ініцыятыва дапаможа ў вырашэнні гэтага пытання, а таксама павысіць бяспеку дарожнага руху, раней адзначалі ў МУС Расіі.

Як паведамлялі СМІ, спасылаючыся на адкрытую статыстыку, за шэсць месяцаў 2023 года па віне грамадзян рэспублікі ў РФ адбылося 115 ДТЗ, у якіх загінулі 25 чалавек. У 2022-м за аналагічны перыяд у суседняй краіне былі ўчынены 104 дарожна-транспартныя здарэнні па віне беларускіх вадзіцеляў.