Дзень народнага адзінства Расіі адзначылі ў Гродне

ГРОДНА, 3 ліс – Sputnik, Іна Грышук. Прыгажосць пейзажаў, гарадоў і культурных каштоўнасцей, якія сімвалізуюць дух адзінства Саюзнай дзяржавы, вырашылі паказаць жыхарам Гродна. Фотавыстава пад назвай "Дзіўны свет Беларусі і Расіі" адкрылася ў КЦ "Фестывальны" ў пятніцу, 3 лістапада.

У гэты ж дзень адбылася перадача манет на народны помнік воінам ВАВ, які ўстановяць у Маскве.

Здымкі аб прыгажосці Расіі і Беларусі

Выстаўка складаецца з 30 работ, выкананых фатографамі з Расіі і Беларусі. На іх адлюстраваны гарады, маляўнічыя вёскі, велічныя горы, прыгажосць і багацце культуры і прыроды абедзвюх краін.

"На 15 планшэтах, прысвечаных Беларусі, адлюстраваны работы фотамастакоў Гомельшчыны. На 15 планшэтах, прысвечаных Расіі, можна бачыць работы расійскіх фатографаў – удзельнікаў міжнароднага конкурсу "Русская цивилизация", які праводзіцца Федэральным агенцтвам па справах нацыянальнасцей РФ", - адзначыў падчас цырымоніі адкрыцця загадчык КЦ "Фестывальны" Эдгар Рэц.

Ён таксама падзякаваў супрацоўнікам Генеральнага консульства Расіі ў Гродне, якія дапамаглі арганізаваць выставу.

"Не выпадкова адкрыццё адбываецца напярэдадні аднаго з галоўных дзяржаўных свят у Расійскай Федэрацыі – Дня народнага адзінства. Гэта дзень, які сімвалізуе адзінства нашага народа, гатоўнасць яго абараняць, працаваць дзеля працвітання радзімы. Гэтыя пачуцці блізкія і народу Расіі, і народу Беларусі... У самыя складаныя моманты гісторыі менавіта мужнасць, патрыятызм і нязломная воля нашага народа вызначала лёс краіны. Сёння на нас ляжыць гістарычная адказнасць абараніць тое, што завешчана нам продкамі", - звярнуўся да гасцей фотавыставы в.а. генеральнага консула Расіі ў Гродне Павел Марозаў і павіншаваў суайчыннікаў са святам.

Фотавыстава "Дзіўны свет Беларусі і Расіі" ў культурным цэнтры "Фестывальны" прадоўжыцца да 29 лістапада.

Манеты для народнага помніка ў Маскве.

У гэты дзень успаміналі і аб подзвігу воінаў Вялікай Айчыннай вайны. Напярэдадні важнага для Расіі дзяржаўнага свята дабрачынны фонд Аляксея Талая арганізаваў урачыстую цырымонію перадачы манет для народнага помніка героям ВАВ "Жывая памяць удзячных пакаленняў", які будзе ўстаноўлены ў Маскве 9 мая 2025 года.

У цырымоніі ўдзельнічалі гараджане, а таксама супрацоўнікі Генконсульства Расіі ў Гродне і іх сваякі.

"Адзінства народаў Саюзнай дзяржавы непарыўна звязана з павагай да нашай гістарычнай памяці. Для консульства вялікі гонар прымаць удзел у акцыі фонду Аляксея Талая. Калі бацькі даведаліся, што ў Гродне праводзіцца такая акцыя, яны папрасілі прыехаць у Маскву, забраць манеты і адвезці ў Гродна. Таму я перадаю манеты, сабраныя маімі бацькамі, якія зараз знаходзяцца ў Маскве. Для мяне гэта вялікі гонар і вялікая адказнасць. Рад, што магу гэта зрабіць для іх", - адзначыў Марозаў.

Дыпламат перадаў скрыначку з манетамі прадстаўніку фонду, іх дадалі ў агульную колбу.

"Акцыя "Жывая памяць удзячных пакаленняў" стартавала ў Дзень народнага адзінства Беларусі, і сімвалічна, што цяпер напярэдадні Дня народнага адзінства Расіі мы праводзім цырымонію перадачы манет з удзелам супрацоўнікаў Генконсульства Расіі", - адзначыла прадстаўнік фонду Талая Дзіна Хартман.

Яна нагадала, што збор манет на памятны знак у Маскве працягваецца. У Беларусі ўжо прайшлі зборы на два такія ж помнікі. Адзін з іх устанавілі ў Мінску 2 ліпеня 2022 года на набярэжнай у парку Перамогі, другі плануюць паставіць побач з Брэсцкай крэпасцю ў наступным годзе. Памятны знак у Маскве плануюць адкрыць 9 мая 2025 года на Паклоннай гары.

Колба для манет на помнік "Жывая памяць удзячных пакаленняў" таксама знаходзіцца ў КЦ "Фестывальны", прыносіць манеты сучаснага і савецкага ўзору можа кожны жадаючы.

>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"