МІНСК, 9 сне – Sputnik. Новы графік руху цягнікоў на 2023/2024 гады ўводзіцца на Беларускай чыгунцы з 10 снежня, аб гэтым паведамілі ў прэс-службе БЧ.
Адзначаецца, што графік сфарміраваны ў адпаведнасці з рашэннямі Савета па чыгуначным транспарце дзяржаў-удзельніц Садружнасці.
Ён будзе дзейнічаць на працягу года.
Грузавыя цягнікі
У адпаведнасці з новым графікам, штодзень будуць курсіраваць 1 140 грузавых цягнікоў.
Павялічыцца колькасць грузавых цягнікоў і вагавыя нормы на асноўных напрамках, якія выкарыстоўваюцца для вывазу беларускіх экспартных грузаў у расійскім напрамку. На пагранічных участках паміж Кастрычніцкай чыгункай ААТ "РЖД" і Беларускай чыгункай прадугледжаны рух злучаных паяздоў павышанай вагі.
Акрамя таго, запланавана 89 маршрутаў для кантэйнерных цягнікоў. Яны будуць перамяшчацца з Беларусі ў Расію і далей у краіны Азіі і Кітай, у парты Паўночна-Заходняга рэгіёна Расійскай Федэрацыі. Гэта закране таксама транзітныя перавозкі Еўропа – Расія – Кітай у рамках ініцыятывы "Адзін пояс, адзін шлях".
Пасажырскія цягнікі
Паводле звестак БЧ, прадугледжана курсіраванне 762 пасажырскіх цягнікоў. Адзначаецца, што графік руху на 2023/2024 гады складаўся на падставе маніторынгу попыту на перавозкі і аналізу асноўных пасажырапатокаў.
Захоўваецца ў тых жа аб’ёмах рух цягнікоў у напрамку Масквы, Санкт-Пецярбурга, Адлера, Анапы, Мурманска і Самары.
Для цягніка Мінск – Архангельск на 17 гадзін скарочаны час у дарозе. Дзякуючы змене маршруту цягніка можна здзейсніць паездку ў Яраслаўль і Волагду праз Маскву.
Таксама з’явіцца магчымасць даехаць з Мінска да Мінеральных Вод і Ніжняга Ноўгарада. У БЧ адзначылі, што на гэтыя цягнікі ўжо прададзена больш за 700 білетаў.
У прэс-службе ўдакладнілі, што 52 цягнікі будуць сумеснага фарміравання Беларускай чыгункі і ААТ "РЖД".
Па Беларусі, згодна з новым графікам, на працягу года пасажыраў будуць перавозіць 700 цягнікоў.
У прыватнасці, Мінск і абласныя цэнтры, а таксама буйныя гарады краіны звяжуць больш за 60 цягнікоў міжрэгіянальных і рэгіянальных ліній бізнес-класа.
Прызначаны новы цягнік міжрэгіянальных ліній №623/624 па маршруце Віцебск – Мінск – Віцебск, які будзе хадзіць па пятніцах і нядзелях.
Прадоўжаны маршрут цягніка міжрэгіянальных ліній №635 Мінск – Пінск (ён будзе рухацца да станцыі Брэст-Цэнтральны з прыпынкамі ў райцэнтрах Іванава, Драгічын, Кобрын, Жабінка).
У новым графіку руху для перавозак пасажыраў запланавана курсіраванне 72 цягнікоў гарадскіх ліній і каля 500 цягнікоў рэгіянальных ліній эканомкласа больш як па 50 напрамках.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"