МІНСК, 14 сту – Sputnik. Міністэрства адукацыі зацвердзіла пералік пунктаў правядзення цэнтралізаванага экзамену (ЦЭ) у 2024 годзе і замацаваных за імі ўстаноў агульнай сярэдняй адукацыі, вынікае з пастановы ведамства №371, апублікаванай на Нацыянальным прававым інтэрнэт-партале.
У Брэсцкай вобласці будзе 17 пунктаў, да кожнага з якіх адносіцца тая ці іншая школа і гімназія рэгіёна. Экзамен, у прыватнасці, правядуць у Брэсцкім дзяржаўным тэхнічным універсітэце, у Брэсцкім дзяржаўным універсітэце імя Пушкіна, у Баранавіцкім дзяржуніверсітэце, Палескім дзяржуніверсітэце, Драгічынскім дзяржаўным аграрным каледжы, сярэдняй школе №3 горада Жабінка і іншых установах адукацыі.
У Віцебскай вобласці такіх пунктаў 22 – гэта таксама ўніверсітэты, каледжы і сярэднія школы.
У Гомельскай вобласці школьнікаў прымуць 26 пунктаў правядзення ЦЭ, у Гродзенскай – 21, у Магілёўскай і Мінскай – па 24. Сталічныя школьнікі будуць здаваць экзамен у 10 універсітэтах.
Пунктаў, якія арганізуюць правядзенне школьнага выпрабавання ў рэзервовыя дні, будзе шэсць – па адным на кожны рэгіён краіны.
Тэрміны правядзення ЦЭ і рэпетыцыя экзамену
Цэнтралізаваны экзамен у Беларусі пачалі праводзіць у 2023 годзе. Яго здаюць выпускнікі 11 класаў па двух вучэбных прадметах: рускай ці беларускай мове і другім прадмеце на выбар.
Сертыфікаты з вынікамі ЦЭ можна падаваць пры паступленні ў ВНУ.
У гэтым годзе ЦЭ пройдзе 27 і 30 мая – гэта будныя дні. У 2023-м экзамен праводзілі па нядзелях.
Акрамя таго, усе школьнікі краіны прымуць удзел у агульнарэспубліканскай рэпетыцыі цэнтралізаванага экзамену 27 студзеня.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"