МІНСК, 25 сту – Sputnik. Нагрудныя знакі для паляўнічых намінацый зроблены з высакародных металаў, заявіў старшыня БТПР Ігар Шуневіч, перадае карэспандэнт Sputnik.
Па словах Ігара Шуневіча, прэзентацыя "Нацыянальнай трафейнай кнігі" важная для ўсёй паляўнічай індустрыі ў краіне. Для людзей, якія маюць дачыненне, гэта вялікая падзея, якая падводзіць рысу пад плённай працай.
Нацыянальны ўзровень
Ігар Шуневіч нагадаў, што Беларусь мае вялікія паляўнічыя традыцыі і кожная краіна павінна мець такі рэйтынгавы інструмент, як трафейная кніга.
"Намі быў вывучаны вопыт вядзення трафейных кніг у свеце. Быў вызначаны падрадчык, які ажыццявіў тэхнічна гэту задуму", - расказаў старшыня БТПР.
© Sputnik / Виктор Толочко
Пры гэтым ён адзначыў, што электронная "Нацыянальная трафейная кніга" працуе ўжо на сайце таварыства. Каб у яе патрапіць, трэба прайсці працэдуру рэгістрацыі. Затым выбраць выгляд здабытага трафея, загрузіць да трох фатаграфій і прымацаваць сертыфікат. Пасля чаго заяўка адпраўляецца на мадэрацыю, якая займае да трох дзён.
Каштоўны трафей
Ігар Шуневіч звярнуў асобную ўвагу, што ў Беларусі ўведзены спецыяльныя паляўнічыя намінацыі: "Вялікая Беларуская сямёрка" і "Вялікая Беларуская пяцёрка". Людзі, якія здабылі ўсе неабходныя трафеі, атрымаюць спецыяльныя нагрудныя знакі.
"Гэта ўнікальны знак, і ў Беларусі такога няма. Мы паглядзелі шмат аналагаў: немцы, расіяне, французы. Кожны да гэтага падыходзіць па-свойму. Мы вырашылі зрабіць сціпла і з густам. Гэты знак будзе выдавацца бясплатна паляўнічаму, які яго заваюе. Нацыянальная трафейная кніга захавае кавалераў гэтага знака навечна", - падкрэсліў ён.
© Sputnik / Виктор Толочко
Старшыня БТПР выказаў надзею, што ў перспектыве валоданне такім нагрудным знакам стане цікавым і для паляўнічых з Расіі. Хоць спісак жывёл у намінацыях дастаткова складаны. Таму на засваенне кожнай намінацыі адведзена пяць гадоў.
Асаблівасці беларускай рыбалкі
Ігар Шуневіч канстатаваў, што "Нацыянальная трафейная кніга" створана для паляўнічых і рыбакі ў дадзеным выпадку аказаліся некалькі абдзеленыя.
"На мой погляд тут павінны быць такія ж падыходы. Гэта такая ж сістэма ацэнкі трафеяў рыбных. Магчыма, з такімі ж баламі і ацэнкамі, экспертнымі заключэннямі. Пры ініцыятыве мы можам стварыць такую ж версію па рыбалцы", - выказаў меркаванне ён.
Праўда, старшыня БТПР асабліва адзначыў, што да гэтага часу просьбаў ад рыбакоў, якія ўваходзяць у арганізацыю, аб заснаванні такой кнігі для іх не паступала.
© Sputnik / Виктор Толочко
Пры гэтым ён запэўніў: калі рыбакі выступяць з такой ініцыятывай, то для іх гэта будзе зроблена, таму што яны сапраўды такія ж члены БТПР, як і паляўнічыя.
Ігар Шуневіч лічыць, што не складана зрабіць і такі ж нагрудны знак з рыбамі. Тым не менш ёсць і пэўныя складанасці: падрыхтоўка трафея дзікай жывёлы адрозніваецца ад падрыхтоўкі рыбнага трафея, улічваючы, што гэта прадукт, які хутка псуецца.
На думку старшыні БТПР, цалкам магчыма, што для стварэння трафейнай кнігі для рыбакоў будзе дастаткова і фота з аб’ектыўнымі сродкамі вымярэння, таму што ў грамадстве зараз прапаведуецца прынцып: злавіў – адпусці.
"Будзе ініцыятыва – мы гэта зробім", - сказаў на заканчэнне Ігар Шуневіч.
Прэзентацыя "Нацыянальнай трафейнай кнігі"
© Sputnik / Виктор Толочко
Раніцай – грошы, увечары – крэслы
Ігар Шуневіч распавёў пра парадаксальную сітуацыю, якая складваецца ў адносінах БТПР з Міжнародным саветам па паляванні і ахове жывёльнага свету (Conseil International de la Chasse et de la Conservation du Gibier, CIC – Sputnik). Цяпер CIC патрабуе выплаты членскіх узносаў, хаця беларускі бок не прыцягвае да сваіх мерапрыемстваў і не запрашае на пасяджэнні.
"Мы гэта ў сваю чаргу ігнаруем і грошы не дасылаем. Нахабства гэтае відавочна для нас", - звярнуў ўвагу старшыня БТПР.
Пры гэтым ён выказаў надзею, што замежныя паляўнічыя вернуцца ў нашу краіну для заваявання адной з намінацый, заснаваных для паляўнічых.
P.S.
Ігар Шуневіч расказаў карэспандэнту Sputnik, што нагрудныя знакі выраблены на ювелірным заводзе (Гомельскае ВА "Крышталь") са срэбра 975-й пробы і золата 575-й пробы.
Сабекошт такога знака зараз у БТПР не раскрываюць, як сказаў старшыня, зараз гэта камерцыйная тайна, але, калі паляўнічых будзе цікавіць, для іх інфармацыю раскрыюць.
Нагрудны знак паляўнічыя атрымаюць за трафеі, здабытыя з моманту яго заснавання. Трафеі, здабытыя раней, не будуць улічвацца, і рэтраспектыўнага ўзнагароджання не будзе.
© Sputnik / Виктор Толочко
Старшыня БТПР лічыць, што патрабаванне ўкласціся ў пяць гадоў, каб здабыць неабходныя для намінацыі на нагрудны знак трафеі, адпавядае таму факту, што сама ўзнагарода з’яўляецца ўнікальнай.
"За пяць гадоў вы маеце магчымасць спланаваць, дапусцім, у адзін год здабычу лася, другі год – казулі, трэці год – аленя, чацвёрты – зубра і гэтак далей. Часу хапае, на мой погляд, нават больш чым. Пяць гадоў – гэта вялікі тэрмін", - упэўнен ён.
Ігар Шуневіч канстатаваў, што цяпер у БТПР няма ўзаемадзеяння з міжнароднымі структурамі, таму што ад іх толькі прыходзяць паведамленні з просьбамі аплаціць узносы.
"Вы не аплацілі ў мінулым, просім аплаціць у гэтым. Мы гэта, натуральна, ігнаруем, паколькі ні на адно мерапрыемства, якія праводзяць гэтыя структуры, мы не былі запрошаны. Мы разумеем, што там ідзе ігнараванне нас, як структуры. Мы не абавязаны адказваць на такія запыты", - лічыць старшыня.
У завяршэнне ён дадаў, што цяпер з замежных грамадзян у Беларусі палююць у асноўным расіяне, а таксама прыезджыя з іншых краін блізкага замежжа і СНД.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"