МІНСК, 8 лют – Sputnik. Прэзідэнт Беларусі Аляксандр Лукашэнка павіншаваў народную артыстку Расіі Ірыну Мураўёву з днём нараджэння, аб гэтым паведаміла прэс-служба кіраўніка дзяржавы.
"Яркі талент, непаўторнае акцёрскае майстэрства і бясконцае жаночае абаянне прынеслі Вам заслужаны поспех і прызнанне мільёнаў прыхільнікаў", - гаворыцца ў віншаванні.
Адзначаецца, што творчасць актрысы, заснаваная на найлепшых традыцыях савецкага кінематографа і тэатральнага мастацтва, атрымала шырокую папулярнасць у нашай краіне. Беларускія гледачы ведаюць і любяць спектаклі і фільмы з удзелам Мураўёвай.
Лукашэнка ўпэўнен, што і ў далейшым дзейнасць народнай артысткі будзе садзейнічаць умацаванню дружбы і развіццю культурнага супрацоўніцтва паміж брацкімі народамі Беларусі і Расіі.
Беларускі лідар таксама пажадаў Мураўёвай моцнага здароўя, шчасця і дабрабыту.
Народная артыстка Расіі Ірына Мураўёва адзначае ў чацвер, 8 лютага, сваё 75-годдзе.
Актрыса тэатра і кіно
Ірына Мураўёва нарадзілася ў Маскве ў сям’і ваеннаслужачага. Яна скончыла драматычную студыю пры Цэнтральным дзіцячым тэатры і служыла ў ЦДТ на працягу сямі гадоў. З 1977 па 1991 год актрыса працавала ў Маскоўскім тэатры імя Массавета, а з 1993-га – у Дзяржаўным акадэмічным Малым тэатры.
Акрамя тэатральнай дзейнасці, Мураўёва вядома як актрыса кіно. У 1973 годзе яна дэбютавала ў ролі маляра Зінаіды Багляевай у тэлевізійным серыяле "Разные люди".
Поспех да Мураўёвай прыйшоў пасля ролі Людмілы Свірыдавай у карціне "Москва слезам не верит". Карціна ўдастоілася прэміі "Оскар" як лепшы замежны фільм.
Не менш папулярнымі сталі ролі Ніны Саламацінай у "Карнавале" (1981) і Надзі Клюевай у "Самой обаятельной и привлекательной" (1985).
Актрыса здымалася таксама ў фільмах "Артистка из Грибова", "Когда опаздывают в ЗАГС", "Зефир в шоколаде", "Любовь зла…" і многіх іншых, а таксама ў серыялах.
Мураўёва працавала і ў агучванні. Яе голасам гавораць героі мультфільмаў "Пес в сапогах", "Неуловимый Фунтик", "Фунтик и сыщики", "Теремок", "Букашки", "Тяжелый песок".
Мураўёва мае таксама шэраг дзяржаўных узнагарод.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"