МІНСК, 5 сак – Sputnik. Органы заканадаўчай і выканаўчай улады Беларусі прымаюць неабходныя меры для падтрымання канстытуцыйнага парадку ў краіне, заявіў старшыня Канстытуцыйнага суда Пётр Міклашэвіч, перадае карэспандэнт Sputnik.
Напярэдадні 30-годдзя Канстытуцыі Беларусі суд звярнуўся са штогадовым пасланнем да прэзідэнта і парламента.
"Грамадзяне Беларусі сустракаюць юбілей Канстытуцыі з перакананнем у канстытуцыйнай бяспецы, з упэўненасцю ў тым, што дзяржаўныя органы ў адпаведнасці з канстытуцыйнымі прынцыпамі прымаюць неабходныя меры па супрацьдзеянні знешнім і ўнутраным пагрозам", - заявіў Міклашэвіч.
Пры гэтым кіраўнік Канстытуцыйнага суда падкрэсліў, што і грамадзяне павінны з пачуццём адказнасці і патрыятызму ўносіць свой уклад у далейшы дынамічны ўстойлівы росквіт Беларусі.
Міклашэвіч падкрэсліў, што ўвесь 30-гадовы перыяд з першай Канстытуцыі Рэспублікі Беларусь, краіна развіваецца як дэмакратычная, сацыяльна-прававая дзяржава, у якой эфектыўна функцыянуе сістэма дзяржаўнай улады ў інтарэсах народа, рэальна забяспечваюцца і абараняюцца правы і свабоды чалавека і грамадзяніна.
Паводле яго слоў, у абноўленай Канстытуцыі ўмацаваны дэмакратычныя асновы ўладкавання грамадства і дзяржавы, узмоцнены гарантыі захавання нацыянальных і традыцыйных каштоўнасцей, сацыяльных праў грамадзян.
Парламентам прынята каля 90 законаў, накіраваных на выпрацоўку заканадаўчага механізма забеспячэння рэалізацыі палажэнняў абноўленай Канстытуцыі.
"Канстытуцыйны суд канстатуе, што ў заканатворчым працэсе не дапушчана супярэчнасцей Канстытуцыі. Упаўнаважаныя дзяржаўныя органы ва ўстаноўленым парадку не звярталіся ў Канстытуцыйны суд з прапановамі аб праверцы канстытуцыйнасці норм законаў, якія былі прыняты парламентам", - падкрэсліў Міклашэвіч.
Пасланне Канстытуцыйнага суда Беларусі сёлета складаецца з некалькіх раздзелаў, уступнай і заключнай часткі. Яно будзе накіравана прэзідэнту, парламенту і СМІ 7 сакавіка.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"