Датэрмінова на выбарах прэзідэнта РФ прагаласавалі 1,4 млн чалавек

МІНСК, 11 сак – Sputnik. Больш за 1,4 млн выбаршчыкаў прагаласавалі датэрмінова на выбарах прэзідэнта Расіі, паведаміла старшыня Цэнтрвыбаркама РФ Эла Памфілава.

Прэзідэнцкія выбары ў краіне прызначаны на 17 сакавіка, асноўнае галасаванне адбудзецца 15-17 сакавіка, у лютым пачаўся этап датэрміновага волевыяўлення ў аддаленых рэгіёнах Расіі.

Па словах Памфілавай, гэтыя даныя тычацца датэрміновага галасавання ў 39 суб’ектах РФ.

Яна паведаміла, што датэрміновае галасаванне на тэрыторыях 42 суб’ектаў будзе праводзіцца яшчэ да 14 сакавіка.

Кіраўнік ЦВК нагадала, што выбарчыя ўчасткі арганізаваны ў аддаленых мясцовасцях, на марскіх суднах, а таксама ў воінскіх часцях, якія знаходзяцца далёка ад населеных пунктаў.

У адпаведнасці з выбарчым заканадаўствам, з 25 лютага ў шэрагу рэгіёнаў Расіі ўжо пачалося датэрміновае галасаванне, гэта цяжкадаступныя і аддаленыя рэгіёны – такія як Камчатка, Якуція, Амурская вобласць.

На гэтыя прэзідэнцкія выбары ў РФ ідуць чатыры кандыдаты – Цэнтрвыбаркамам прэтэндэнтамі на вышэйшую дзяржаўную пасаду зарэгістраваны Леанід Слуцкі (ЛДПР), Мікалай Харытонаў (КПРФ), Уладзіслаў Даванкоў (партыя "Новыя людзі") і Уладзімір Пуцін (самавылучэнец).

На прэзідэнцкіх выбарах у Расіі за мяжой таксама будуць адкрыты выбарчыя ўчасткі. У Беларусі грамадзяне РФ будуць галасаваць 17 сакавіка. Для гэтага ёсць шэсць участкаў: у Мінску і абласных цэнтрах – Брэсце, Віцебску, Гомелі, Гродне і Магілёве.

Як паведамілі ў пасольстве РФ, у Мінску ўчастак для галасавання будзе працаваць у будынку дыпмісіі, у Брэсце – у расійскім генконсульстве, у Гомелі – у Расійскім цэнтры навукі і культуры, у Магілёве – у ліцэі Беларуска-расійскага ўніверсітэта.