МІНСК, 11 кра – Sputnik. Кіраўнік Беларусі Аляксандр Лукашэнка ў ходзе сустрэчы з міністрам замежных спраў Узбекістана Бахціерам Саідавым падзякаваў Ташкенту за падтрымку ў пытанні ўступлення ў ШАС.
"Мы паставілі тады перад сабой амбіцыйныя планы – дасягнуць абароту ў гандлі ў мільярд долараў. Я думаю, што ў нас часу няма для таго, каб кудысьці адступаць, ды і не трэба", - цытуе Лукашэнку яго прэс-служба.
Паводле слоў кіраўніка дзяржавы, беларускі бок зробіць усё, што неабходна для дасягнення пастаўленых задач. Асаблівую ўвагу тут трэба ўдзяліць стварэнню сумесных вытворчасцей.
"Мы гаварылі тады (візіт ва Узбекістан - Sputnik) аб БелАЗе і гэтак далей. Давайце будзем прадметна ў гэтым напрамку працаваць. Мы ў гэтым зацікаўлены. У нас ёсць што прапанаваць Узбекістану", - запэўніў беларускі лідар.
Пасля чаго дадаў, што калі кіраўнік МЗС Узбекістана пажадае наведаць беларускія прадпрыемствы і ацаніць прадукцыю, то гэта будзе арганізавана.
Лукашэнка асабліва адзначыў, што беларускі бок добра ставіцца да сваіх партнёраў з Узбекістана і так будзе заўжды.
"Я часта гавару аб тым, што мы вельмі падобныя сваёй працавітасцю, патрыятычнасцю і стаўленнем да сваёй дзяржавы. Таму давайце будзем выконваць дамоўленасці, якіх мы дасягнулі тады ў Ташкенце", - заклікаў ён.
У сваю чаргу Бахціер Саідаў перадаў беларускаму лідару словы ўзбекскага прэзідэнта Шаўката Мірзіеева, які папрасіў міністра перадаць "найлепшыя пажаданні майму сябру".
Кіраўнік МЗС Узбекістана назваў візіт Лукашэнкі ў Ташкент гістарычным і запэўніў, што ўзбекскі бок гатоў павысіць узровень адносін з Мінскам.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"