Марыне Васілеўскай прысвоена званне Героя Беларусі

МІНСК, 11 кра – Sputnik. Першай жанчыне-касманаўту ў гісторыі сучаснай Беларусі Марыне Васілеўскай прысвоена званне героя, перадае карэспандэнт Sputnik.

Урачыстая цырымонія ўручэння залатой зоркі героя адбылася ў чацвер, 11 красавіка, у Палацы Незалежнасці. Узнагароду касманаўт атрымала з рук прэзідэнта Беларусі Аляксандра Лукашэнка.

Такім чынам, Васілеўская стала 14-м па ліку Героем Беларусі. Апошні раз гэта ганаровае званне прысвойвалася ў 2021 годзе – пасмяротна ваенным лётчыкам Мікіце Куканенку і Андрэю Нічыпорчыку. У спіску герояў, у прыватнасці, ёсць біятланістка Дар’я Домрачава, мітрапаліт Філарэт і экс-кіраўнік Нацбанка рэспублікі Пётр Пракаповіч.

Васілеўская – першая грамадзянка Беларусі, якая адправілася ў космас. Стартаваў карабель "Союз МС-25" 23 сакавіка, на борце таксама знаходзіліся Алег Навіцкі і астранаўт NASA Трэйсі Дайсан. Палёт заняў двое сутак, стыкоўка з МКС адбылася ў 18:03 мск (супадае з мінскім часам) 25 сакавіка. Яшчэ праз пару гадзін пасля выраўноўвання ціску экіпаж адчыніў люкі і перайшоў на станцыю. У праграму знаходжання яе на МКС уваходзіў шэраг навуковых эксперыментаў.

Васілеўская, а таксама яе дублёр Анастасія Лянкова, паводле нядаўна прынятага ўказу прэзідэнта Беларусі, афіцыйна лічацца беларускімі касманаўтамі.

Раней кіраўнік беларускай дзяржавы заяўляў, што хацеў бы, каб на арбіту злятала і дублёр Васілеўскай – Лянкова.