Крыпта – гэта падземнае памяшканне ў касцёле з тоўстымі сценамі і скляпеністымі столямі, якое выкарыстоўвалася як магільны склеп. Яны ёсць у многіх храмах, але для турыстаў да нядаўняга часу была адкрыта толькі адна – у Нясвіжскім касцёле.
Навагрудскі храм стаў другім у Беларусі, дзе падземная частка адкрыта для турыстаў. Крыпта знаходзіцца ў касцёле святога архангела Міхаіла, яе адчынілі ў канцы красавіка. Падзею прымеркавалі да 400-гадовага юбілею храма, які адзначаць восенню.
Адкрытыя для турыстаў старажытныя падзямеллі займаюць прыкладна трэць ад агульнай плошчы ўсяго храма. Каб іх адчыніць для наведвання, спатрэбілася тры гады. Выносілі смецце, чысцілі і ўмацоўвалі старажытную цэглу.
Крыпту можна ўмоўна падзяліць на дзве часткі. Далёкая – размешчаная бліжэй да алтара была пабудавана ў пачатку XVII стагоддзя разам з капліцай, гэтым сценам – больш за 400 гадоў. Частка крыпты, размешчаная бліжэй да ўваходу, была пабудавана прыкладна на 70-80 гадоў пазней.
"Самае каштоўнае тут – атмасфера, у якую чалавек трапляе, калі заходзіць у гэтую крыпту. У самай старой частцы касцёла мы дакранаемся да гісторыі людзей, якія стаялі ля вытокаў заснавання гэтага храма. Гэта сям’я Хадкевічаў, якія былі мецэнатамі гэтага месца 400 гадоў таму, і манахаў дамініканцаў, якія заснавалі гэты храм. У гэтым месцы знаходзяцца іх астанкі. Таксама ў крыпце можна ўбачыць невялікую, але вельмі цікавую экспазіцыю старых рэчаў, якія належалі касцёлу", - распавёў настаяцель храма.
Менш чым за месяц у падзямеллях навагрудскага храма пабывала каля тысячы чалавек – гэта групавыя і індывідуальныя турысты. Хтосьці ўключае крыпту ў гарадскія экскурсійныя маршруты, а хтосьці спецыяльна прыязджае, каб пагуляць па старажытных падвалах. Тут былі госці з Беларусі, Расіі, Кітая, Грузіі. Геаграфія толькі пашыраецца. Уваход бясплатны, пажадана ў падзяку пакінуць ахвяраванне на далейшыя рэстаўрацыйныя работы ў крыпце.
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"