МІНСК, 29 мая – Sputnik. Кіраўнік беларускай дзяржавы Аляксандр Лукашэнка павіншаваў старшыню Вышэйшага Еўразійскага эканамічнага савета, прэм’ер-міністра Арменіі Нікола Пашыняна, членаў ВЕЭС – прэзідэнтаў Расіі, Казахстана і Кыргызстана Уладзіміра Пуціна, Касым-Жамарта Такаева, Садыра Жапарава – з Днём Еўразійскага эканамічнага саюза, паведаміла прэс-служба беларускага лідара.
Па словах беларускага прэзідэнта, за дзесяць гадоў існавання ЕАЭС даказаў сваю запатрабаванасць і эфектыўнасць. І на сённяшні дзень Саюз з’яўляецца важным рэгіянальным інтэграцыйным аб’яднаннем, якое забяспечвае эканамічнае ўзаемадзеянне краін-удзельніц на аснове раўнапраўя і партнёрства.
"Далейшае пашырэнне дзейнасці арганізацыі, якая зарэкамендавала сябе як унікальная дыялогавая пляцоўка, дасць магчымасць паспяхова вырашаць маштабныя задачы, замацаваныя ў Дагаворы аб ЕАЭС, унясе важкі ўклад у сумеснае процідзеянне знешнім выклікам", - перакананы Лукашэнка.
Прэзідэнт пажадаў усім здароўя, сіл і энергіі для дасягнення высокіх мэт. Беларускі лідар таксама падкрэсліў, што будзе рад прадаўжэнню канструктыўнага супрацоўніцтва.
Стварэнне ЕАЭС
Дагавор аб стварэнні Еўразійскага эканамічнага саюза быў падпісаны 29 мая 2014 года ў Астане прэзідэнтамі Расіі, Беларусі і Казахстана.
ЕАЭС створаны на базе Мытнага саюза і Адзінай эканамічнай прасторы Беларусі, Казахстана і Расіі як міжнародная арганізацыя рэгіянальнай эканамічнай інтэграцыі, якая мае міжнародную правасуб’ектнасць.
Статус дзяржаў-членаў саюза маюць Арменія (з 2 студзеня 2015 года), Беларусь, Казахстан, Кыргызстан (з 12 жніўня 2015 года) і Расія. У маі 2018 года статус дзяржавы-назіральніка атрымала Малдова. У снежні 2020 года статус назіральнікаў пры Еўразійскім эканамічным саюзе далі Узбекістану і Кубе.
Плошча тэрыторыі краін ЕАЭС – больш за 20 млн квадратных кіламетраў (14% сусветнай сушы).
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"