Сукала прыме ўдзел у Форуме старшынь Вярхоўных судоў краін БРІКС

МІНСК, 13 чэр – Sputnik. Старшыня Вярхоўнага суда Беларусі Валянцін Сукала на наступным тыдні адправіцца ў Расію, дзе прыме ўдзел у Форуме старшынь вярхоўных судоў краін БРІКС, паведамілі ў вышэйшым судовым органе рэспублікі.

Там удакладнілі, што мерапрыемства адбудзецца з 17 па 21 чэрвеня ў Сочы.

Прысутнасць Беларусі на Форуме будзе садзейнічаць распаўсюджванню аб’ектыўнай інфармацыі аб краіне і яе судовай сістэме, умацаванню прафесійных сувязей, пашырэнню супрацоўніцтва з прадстаўнікамі судовых органаў дзяржаў БРІКС і абмену вопытам у вырашэнні актуальных прававых пытанняў, падкрэслілі ў Вярхоўным судзе.

У рамках мерапрыемства будуць абмеркаваны пытанні забеспячэння аднастайнасці судовай практыкі і абароны сацыяльных праў грамадзян. Увага таксама будзе ўдзелена ўкараненню тэхналогій у судовыя працэсы, гарманізацыі заканадаўства дзяржаў-удзельніц БРІКС, абароне праў інвестараў і абароне праў чалавека і асноўных свабод у крымінальным судаводстве.

Як чакаецца, у рабоце форуму прымуць удзел старшыні вышэйшых судовых інстанцый Кітая, Ірана, Егіпта, Эфіопіі, ПАР, Індыі, паведамілі ў Вярхоўным судзе Беларусі.

Аб’яднанне БРІКС было заснавана ў 2006 годзе. Першапачаткова ў яго ўваходзілі Бразілія, Расія, Індыя, Кітай і ПАР, адсюль і назва BRICS (Brazil, Russia, India, China, South Africa).

Са студзеня 2024-га да БРІКС далучыліся Егіпет, Іран, ААЭ, Саудаўская Аравія і Эфіопія.

Насельніцтва ўсіх дзяржаў-удзельніц аб’яднання складае 3,6 млрд чалавек – гэта амаль палова жыхароў планеты.

Аб жаданні ўступіць у БРІКС ужо заявілі і іншыя краіны, у іх ліку – Беларусь. Афіцыйныя звароты ў адрас кіраўнікоў дзяржаў-членаў БРІКС аб прыёме ў аб’яднанне былі накіраваны Мінскам у маі 2023 года. Як заяўляў кіраўнік МЗС Беларусі Сяргей Алейнік, рэспубліка спадзяецца на іх падтрымку і на больш хуткае ўваходжанне ў БРІКС.

З 1 студзеня ў аб’яднанні старшынствуе Расія.