МІНСК, 16 чэр – Sputnik. Спецсастаў "Цягнік Перамогі" будзе знаходзіцца ў Беларусі з 21 чэрвеня па 21 ліпеня, паведамляе прэс-цэнтр Беларускай чыгункі (БЧ).
"Перасовачны музей пабывае ў 23 гарадах нашай рэспублікі", - гаворыцца ў паведамленні.
У БЧ растлумачылі, што першы прыпынак будзе ў Брэсце, а затым састаў адправіцца ў Пінск, Лунінец, Баранавічы, Оршу, Магілёў, Крычаў, Горкі, Віцебск, Полацк, Мінск, Маладзечна, Ліду, Гродна, Ваўкавыск, Салігорск, Слуцк, Асіповічы, Бабруйск, Жлобін, Калінкавічы, Рэчыцу і Гомель.
"У сувязі з абмежаванай прапускной здольнасцю перасовачнага музея яго наведванне будзе ажыццяўляцца толькі арганізаванымі групамі жыхароў рэгіёнаў па запрашальных білетах, якія размяркоўваюцца абласнымі выканаўчымі камітэтамі і Мінскім гарадскім выканаўчым камітэтам", - таксама адзначылі ў прэс-цэнтры.
Гісторыя цягніка
Першае падарожжа "Цягнік Перамогі" распачаў у 2020 годзе. Тады экспазіцыю паказвалі толькі ў расійскіх гарадах.
У 2021 годзе састаў упершыню прыбыў у Беларусь. Усяго за два гады ён пераадолеў шлях 110 тыс км, пабываўшы ў 124 гарадах Саюзнай дзяржавы.
Інтэрактыўны музей расказвае пра падзеі 1941-1945 гадоў. З дапамогай сучасных тэхналогій ствараецца эфект прысутнасці. У вагонах цягніка ўстаноўлены некалькі дзесяткаў відэапраектараў, больш за 140 мультымедыйных экранаў і каля двух дзесяткаў відэасцен, выкарыстоўваюцца тэхналогіі дапоўненай рэальнасці і аб’ёмны гук.
Экспазіцыя пастаянна дапаўняецца, і ў мінулым годзе ў цягніку з’явіўся вагон, у якім можна даведацца пра ваенныя трыбуналы над нацыстамі.
"Цягнік Перамогі" быў створаны ў Расіі сіламі некалькіх арганізацый і ведамстваў. Аўтары ідэі – група пецярбургскіх мастакоў з творчай майстэрні "Невский баталист" на чале з Дзмітрыем Паштарэнкам. Над праектам працавала каманда з 70 чалавек.
Акрамя майстэрні, у стварэнні ўдзельнічала і медыягрупа "Красный квадрат" пры падтрымцы Міністэрства навукі і вышэйшай адукацыі РФ, ААТ "Российские железные дороги" і Усерасійскага грамадскага руху "Волонтеры Победы".
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"