МІНСК, 21 чэр – Sputnik. Улады Беларусі пачнуць рэалізацыю праекта па арганізацыі хуткасных чыгуначных зносін паміж Мінскам і суседнімі гарадамі ў бліжэйшы час, заявіў прэзідэнт краіны Аляксандр Лукашэнка ў час рабочай паездкі ў Дзяржынскі раён.
Паводле слоў беларускага лідара, у бліжэйшай будучыні, магчыма, у наступнай пяцігодцы, улады плануюць як мінімум пачаць, а можа, і рэалізаваць даўнюю мару: звязаць хуткасным чыгуначным транспартам сталіцу і найбліжэйшыя гарады.
"Дапусцім, Лагойск, Дзяржынск, Смалявічы. Павінна быць чыгунка, а па ёй павінна хадзіць вельмі хуткая тэхніка", - сказаў Лукашэнка, яго словы прыводзіць прэс-служба прэзідэнта.
Кіраўнік дзяржавы мяркуе, што, калі чалавек зможа за 20 хвілін дабірацца, напрыклад, з Дзяржынска ў Мінск, то не будзе праблем з работай. Бо ён зможа жыць у Дзяржынску, дзе, на думку Лукашэнкі, жывецца "амаль як на курорце", і ў любы час прыязджаць на працу ў сталіцу.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"