Здымачная група Sputnik прагулялася па Мінску і паглядзела, як гараджане і госці сталіцы святкуюць Дзень Незалежнасці рэспублікі, які сёлета супадае з 80-й гадавінай вызвалення краіны ад нямецка-фашысцкіх захопнікаў.
Самая яркая падзея раніцы – маштабны парад каля стэлы "Мінск горад-герой" на скрыжаванні праспектаў Пераможцаў і Машэрава ў Мінску. Парад у горадзе чакалі доўга – апошні раз ён праходзіў тут 9 мая 2020-га з нагоды святкавання 75-га юбілею Перамогі, а годам раней – у 2019-м – быў прымеркаваны да святкавання Дня Незалежнасці і 75-й гадавіны вызвалення Беларусі.
Сёлета галоўны ажыятаж у публікі выклікала з’яўленне на парадзе АТРК "Искандер" – яны былі прадстаўлены ўпершыню, а таксама комплексаў С-400 і новых беспілотнікаў "Герань" беларускай вытворчасці. Авацыю публікі выклікаў жаночы ваенны разлік, які прыняў удзел у парадзе, і прадстаўнікі Следчага камітэта, якія ўпершыню маршыравалі парадным разлікам.
Цікавым момантам парада стаў удзел у ім замежных вайскоўцаў – азербайджанскіх, казахскіх, кіргізскіх, узбекскіх, таджыкскіх, кітайскіх і расійскіх. У паветранай частцы парада незабыўнае ўражанне зрабіў "кубінскі брыльянт" у выкананні "Русских витязей" і "Стрижей".
Пасля ваеннай часткі парад прадоўжыла калона грамадзянскай тэхнікі, дзе сярод іншага беларусам прадэманстравалі платформу з касмалётам, які сімвалізуе першы палёт прадстаўніцы Беларусі ў космас. Таксама ўпершыню ў грамадзянскай тэхніцы на парадзе паказалі і крэатыўна аформлены вагон метро.
Святкаванне ў горадзе прадоўжылася гуляннямі ў цэнтры і кожным раёне, дзе арганізаваны канцэртныя пляцоўкі і многія іншыя забавы. Адно з месцаў прыцягнення мінчан у свята – Парк Перамогі, дзе сярод іншых святочных мерапрыемстваў працуе і выстава франтавых фатаграфій ад агенцтва Sputnik Беларусь. Сёлета ў выставе "Вызваленне. Шлях да Перамогі" сабраны ўнікальныя здымкі, зробленыя франтавымі рэпарцёрамі Саўінфармбюро падчас аперацыі "Баграціён" у 1944 годзе.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"