Парад камбайнаў і "Песняры": як Гомель адзначае Дзень Незалежнасці

Дзень Незалежнасці і 80-ю гадавіну вызвалення Беларусі ад нямецка-фашысцкіх захопнікаў Гомель па традыцыі сустрэў святочным шэсцем па цэнтральнай вуліцы горада.

У калону сталі больш за 9 тысяч чалавек – гэта прадстаўнікі ўлады, дэпутацкага корпуса, духавенства, працоўных калектываў і грамадскіх арганізацый.

На чале калоны афіцэры МУС і МНС, а таксама курсанты БелДУТа пранеслі сцягі Беларусі, Гомельскай вобласці і горада Гомеля.

За імі ішла моладзь у нацыянальных строях. У руках у юнакоў і дзяўчат былі гербы ўсіх раёнаў Гомельшчыны. А каб гледачы разабраліся ў тонкасцях геральдыкі, побач, зноў жа, моладзь у нацыянальных строях несла саматканыя ручнікі з назвамі раёнаў.

Пасля заканчэння шэсця на вуліцы Працоўнай адбыўся мітынг, удзельнікі якога ўсклалі кветкі да Вечнага Агню і ўшанавалі памяць герояў Вялікай Айчыннай вайны хвілінай маўчання.

Асноўным месцам урачыстасцей арганізатары выбралі плошчу імя Леніна. Свята ў гэтай частцы горада адкрыў незвычайны парад – па плошчы праехала каля паўсотні адзінак сельскагаспадарчай, будаўнічай і дарожнай тэхнікі.

Першымі ў калоне ішлі збожжаўборачныя камбайны, сабраныя на прадпрыемстве "Гомсельмаш" – адзін такі камбайн здольны абмалочваць 24 тоны збожжа за гадзіну.

Потым на плошчы пачаўся музычны нон-стоп. Чакаецца выступленне сталічнай групы "Аура". Творчы і сямейны саюз вязе ў Гомель стопрацэнтныя хіты. Бліжэй да абеду свае лепшыя нумары прадставяць гомельскія аркестры і вядомыя ў горадзе вакалісты, а затым на сцэну паднімуцца легендарныя "Песняры" і бранскі ВІА "Стожары". Заслужаныя калектывы адыграюць гадзінныя праграмы, у рэпертуары не толькі народныя, але і сучасныя песні.

У Грамадска-культурны цэнтр запрасілі прадстаўнікоў розных прафесій з усіх куткоў рэгіёна на цырымонію ўручэння пасведчанняў "Чалавек года – 2024". Хто гэтыя людзі, пакуль што невядома, але, мяркуючы па мінулых гадах, стаць уладальнікам ганаровага звання могуць нават дзеці. Як, напрыклад, выхаванец гімназіі №51 Павел Цітоў, неаднаразовы пераможца міжнародных алімпіяд па матэматыцы. Для гэтага ёсць намінацыя "Адкрыццё".

Забаўляльныя мерапрыемствы запланаваны не толькі ў цэнтры горадзе, але і ў кожным з чатырох раёнаў.

Кульмінацыяй свята стане рэспубліканская акцыя "Праспяваем гімн разам", пасля заканчэння якой, у 23:00, неба над Гомелем расквецяць феерверкі. У гэтым годзе светлавыя залпы будуць запушчаны з шасці пунктаў, уключаючы цэнтральную плошчу.