МІНСК, 8 ліп – Sputnik. У Дзяржаўтаінспекцыі растлумачылі, у чым сэнс дзесяцідзённага перапынку пасля няўдалай здачы экзамену ў аўташколе.
У ДАІ нагадалі, што раней у Беларусі было ўстаноўлена іншае патрабаванне да перапынкаў пры здачы кваліфікацыйных экзаменаў на права кіравання транспартнымі сродкамі.
"Было тры спробы праз сем дзён, а наступныя спробы – праз месяц. Бачачы, што гэта сапраўды вялікія разрывы ў здачы экзаменаў, і грамадзяне не заўсёды могуць захаваць тыя навыкі, якія яны атрымалі ў аўташколе, было прынята рашэнне аб скарачэнні (тэрмінаў пераздачы - Sputnik) да 10 дзён. Гэта значыць з месяца да 10 дзён", - распавёў старшы інспектар па асаблівых даручэннях аддзялення рэгістрацыйна-экзаменацыйнай дзейнасці і тэхнічнага нагляду ўпраўлення нагляднай і рэгістрацыйна-экзаменацыйнай дзейнасці ГУ ДАІ МУС Павел Санкевіч на прэс-канферэнцыі ў панядзелак.
Паводле яго слоў, гэтыя 10 дзён даюцца не для перапынку ў здачы экзамену, а для таго, каб курсант мог зрабіць высновы са сваіх памылак.
"Патрэніравацца, узяць дадатковыя заняткі. І мы палічылі, што гэтых двух тыдняў фактычна будзе дастаткова, каб атрымаць навыкі і павысіць свае ўменні для таго, каб паўторна экзамен ужо прайшоў станоўча. Ссоўваць у бок памяншэння (тэрміны пераздачы - Sputnik) пакуль што не плануецца", - заявіў ён.
Колькі каштуе пераздача?
Сума, якую трэба заплаціць за пераздачу, прывязана да базавай велічыні. Адна спроба здачы практычнага экзамену ў ДАІ на аўтамабілі складае 40 рублёў (1 БВ). Тэарэтычны экзамен – 12 рублёў.
За выдачу вадзіцельскага пасведчання трэба заплаціць дзве базавыя – 80 рублёў. Акрамя таго, неабходна заплаціць камп’ютарныя паслугі і афармленне заявы – 1,60 рубля і 3,20 рубля адпаведна.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"