Усходнія слодычы і коннае шоу: Пуцін прыняў Модзі ў рэзідэнцыі ў Нова-Агарове

У аэрапорце індыйскага прэм’ера вітала расійская дэлегацыя на чале з першым віцэ-прэм’ерам РФ Дзянісам Мантуравым. Пасля выканання нацыянальных гімнаў Індыі і Расіі ваенным аркестрам Модзі прайшоў па чырвонай дарожцы ўздоўж ганаровай варты. Індыйскія СМІ назвалі аказаны прэм’еру прыём грандыёзным і ўрачыстым.

Уладзімір Пуцін сустрэў прэм’ер-міністра Індыі ў сваёй рэзідэнцыі ў Нова-Агарове.

Асноўныя перагаворы лідараў намечаны на аўторак, увечары панядзелка Пуцін і Модзі паразмаўлялі ў нефармальнай абстаноўцы.

Пагулялі па рэзідэнцыі Нова-Агарава – у нейкі момант засталіся адны, без перакладчыка, аднак размова працягнулася, можна меркаваць, што лідары размаўлялі на англійскай.

Выпілі чаю на свежым паветры. На стале стаяла ваза са свежымі ягадамі і садавінай, талерка з фінікамі і сухафруктамі. Пуцін пачаставаў свайго індыйскага госця арэхамі і ўсходнімі слодычамі.

Расійскі лідар пракаціў госця па рэзідэнцыі на гольф-кары, паказаў яму прысядзібны парк з ёлкамі, хвоямі, лісцянымі дрэвамі, кветнікамі і альпійскімі горкамі.

Пуціну і Модзі паказалі коннае шоу. Перад лідарамі выступілі наезніцы, якія выйшлі на арэну з флагамі Расіі і Індыі.

Пасля зазірнулі ў канюшню, дзе пакармілі коней морквай.

8 ліпеня 2024. Прэзідэнт РФ Уладзімір Пуцін і прэм’ер-міністр Індыі Нарэндра Модзі (злева) падчас прагулкі ў рэзідэнцыі ў Нова-Агарове.

Прэм’ер-міністр Індыі падзякаваў прэзідэнту Расіі за прыём у рэзідэнцыі ў Нова-Агарове.

"Дзякую прэзідэнту Пуціну за тое, што ён прыняў мяне сёння ўвечары ў Нова-Агарове. З нецярпеннем чакаю заўтрашніх перагавораў, якія, несумненна, будуць спрыяць далейшаму ўмацаванню дружбы паміж Індыяй і Расіяй", - гаворыцца ў паведамленні Модзі ў сацсетцы X.