МІНСК, 12 ліп – Sputnik. Пятая частка прадукцыі прадпрыемстваў "Белдзяржхарчпрама" пастаўляецца на экспарт, паведаміў падчас прэс-канферэнцыі ў мультымедыйным прэс-цэнтры Sputnik намеснік старшыні канцэрна Аляксандр Якоўчыц.
"Так, недзе пятую частку прадукцыі мы экспартуем. У цэлым па канцэрне, калі браць па выручцы, пятая частка выручкі – гэта валютныя паступленні. Летась мы прадалі прадукцыі ў 49 краін на суму 474 млн долараў. Я ўпэўнен ў тым, што па гэтым годзе мы пераадолеем адзнаку ў паўмільярда", - адзначыў ён.
Асноўны рынак збыту прадукцыі беларускага харчпрама – Расія. Па-першае, у краін падобныя перавагі па прадуктах харчавання, па-другое – выгадна з пункту гледжання лагістычных затрат. Па выніках 2023 года доля РФ у экспарце канцэрна складала каля 64%. У грашовым выражэнні гэта каля 300 млн долараў.
"Прычым увесь асартымент, які вырабляецца прадпрыемствамі, пастаўляецца ў Расійскую Федэрацыю", - удакладніў Якоўчыц.
Еўропа, Афрыка, Азія
Дастаткова буйным рынкам з пункту гледжання выручкі па-ранейшаму з’яўляецца Еўрасаюз, адзначаюць у Белдзяржхарчпраме. У мінулым годзе ў краіны ЕС было адпраўлена прадукцыі на суму каля 60 млн долараў. Разам з тым, геапалітыка дыктуе новыя патрабаванні, і беларускі бок вымушаны шукаць рашэнні, якія дазволяць не страціць долю экспарту на еўрапейскім напрамку.
"Гэтая сітуацыя вакол дала нам дадатковы імпульс для таго, каб мы дыверсіфікавалі экспарт і ўваходзілі ў краіны далёкай дугі са сваёй прадукцыяй. Летась мы адгрузілі ў гэты рэгіён (краіны далёкай дугі - Sputnik) прадукцыі на 32 млн долараў, у тым ліку ў Кітай – 17,5 млн. У 2022-м выручка была 10 млн. Рост адчувальны", - звярнуў увагу намеснік старшыні канцэрна.
Паводле яго слоў, у асноўным у краіны "далёкай дугі" пастаўляюцца кандытарскія вырабы, алеі і спіртныя напоі. У "Белдзяржхарчпраме" сцвярджаюць: гэта дастаткова стратэгічна важны для рэспублікі рэгіён з пункту гледжання патэнцыялу попыту.
Таксама з мінулага года Беларусь актыўна працуе з краінамі Афрыкі.
"Здавалася б, для прадуктаў харчавання, якія маюць пэўныя тэрміны прыдатнасці і рэжымы захоўвання і перавозкі, мы змаглі ўвайсці на гэты рынак у мінулым годзе, прадаўшы прадукцыі на суму 2,8 млн долараў. Гэта быў пяціразовы рост да 2022 года. У асноўным гэта бураковы жом, які пастаўляем у Марока. Таксама мы прадалі 200 тон масла ў Эфіопію. Мы прадаём солад у Экватарыяльную Гвінею, у Гвінею-Бісау. Наша слуцкае прадпрыемства прадало 1,5 тысячы тон цукру ў Гану", - кажа Аляксандр Якоўчыц.
Беларусь працягвае пастаўляць сваю прадукцыю ў Ізраіль (у асноўным алей), Манголію (цукар і кандытарскія вырабы) і іншыя краіны.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"