МІНСК, 19 ліп - Sputnik. Чарга легкавых аўтамабіляў на ўезд у Польшчу з панядзелка вырасла ў чатыры разы, паведамілі ў Дзяржаўным пагранічным камітэце Беларусі.
"Пасля ўвядзення забарон уладамі Літвы і Латвіі транспартныя патокі пераразмеркаваліся на польскі напрамак", - гаворыцца ў паведамленні.
Па стане на раніцу пятніцы перад адзіным польскім пунктам пропуску "Цярэспаль" (сумежны беларускі – "Брэст"), які функцыянуе для легкавушак, сабралася 240 машын.
Перад пунктамі пропуску ў Літву "Мядзінінкай" ("Каменны Лог") і "Шальчынінкай" ("Беняконі") на ўезд у ЕС стаяць 110 аўто.
Самы загружаны ў напрамку ЕС пункт пропуску для вялікагрузаў - "Мядзінінкай", там стаяць 595 грузавікоў, у "Беняконі" - 580.
На працягу тыдня кантрольныя службы польскага пункта "Кукурыкі" ("Казловічы") прымалі ў сярэднім 60% грузавога транспарту, латвійскага "Патэрніекі" ("Грыгараўшчына") - 45%.
Забарона на легкавушкі
Забарона на ўезд у краіну для легкавых аўтамабіляў з беларускімі нумарамі увяла Латвія. Мера пачала дзейнічаць з 16 ліпеня. Затым пра такую ж забарону, з 18 ліпеня, заявіла Літва, а пазней - Эстонія.
У МЗС Беларусі, каментуючы дзеянні заходніх уладаў, назвалі дадзеныя рашэнні бесчалавечнымі і антыгуманнымі.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"