МІНСК, 29 ліп - Sputnik. Формула цаны на нафту з Расіі павінна ўлічваць новыя фактары, заявіў журналістам кіраўнік беларускага ўрада Раман Галоўчанка па выніках нарады ў Палацы Незалежнасці.
Сёння прэзідэнт Беларусі Аляксандр Лукашэнка расказаў у ходзе нарады, што нават яго расійскі калега Уладзімір Пуцін быў здзіўлены, калі пачуў, што кампанія "Раснафта" патрабуе перадаплату за пастаўкі, але да гэтага працавалі без яе.
Беларускі лідэр звярнуўся да прэм'ер-міністра і даручыў дамовіцца аб тым, на якіх умовах у рэспубліку будзе пастаўляцца расійская сыравіна.
Галоўчанка растлумачыў журналістам, што цяпер вострых пытанняў паміж Беларуссю і Расіяй няма. Узровень адносін паміж краінамі інтэнсіўны і яны бурна развіваюцца, таму адны пытанні вырашаюцца, іншыя ўзнікаюць.
Кіраўнікі дзяржаў часта сустракаюцца і ўжо потым даюць даручэнні, якія ўрады ў ходзе перагавораў перакладаюць на паперу.
"Цяпер прэзідэнты таксама абмеркавалі, далі даручэнні. Мы будзем з расійскімі калегамі іх адпрацоўваць", - сказаў прэм'ер аб выніках сустрэчы на Валааме.
Пасля чаго дадаў, што неабходнасць карэкціроўкі формулы цаны на нафту ўзнікла з-за цэнавай кан'юнктуры на сыравінным рынку.
"Трэба асучасніць формулу цэнаўтварэння, каб яна ўлічвала новаўтвораныя фактары, а не толькі тыя, якія дзейнічалі, калі гэтая формула прымалася", - цытуе Галоўчанку БелТА.
Раней Беларусь атрымлівала сыравіну з Расіі па рыначнай цане мінус мытная пошліна. Такая формула дзейнічала дзякуючы двухбаковым дамоўленасцям.
Затым расейскія ўлады правялі рэформу, паводле якой у краіне кожны 1 студзеня паніжаўся ўзровень экспартнай пошліны, але падвышаўся падатак на здабычу карысных выкапняў. Такім чынам цана на чорнае золата да 2024 года павінна была стаць для беларускіх НПЗ цалкам рыначнай.
Праўда, беларускія ўлады дамовіліся, што і на НПЗ у Мазыры і Наваполацку будзе распаўсюджвацца кампенсацыя гэтак званага падатковага манеўру.
Толькі ў 2024 годзе беларускія ўлады разлічваюць атрымаць з бюджэту Расіі каля 61 мільярда расійскіх рублёў (каля 700 мільёнаў долараў).
>>> Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"