МІНСК, 8 жні – Sputnik. Прэзідэнт Беларусі Аляксандр Лукашэнка ўнёс у Палату прадстаўнікоў праект закона "Аб змяненні кодэксаў па пытаннях крымінальнай адказнасці", паведамілі ў прэс-службе кіраўніка дзяржавы.
Распрацоўвала праект закона аб змякчэнні і альтэрнатыўных відах пакарання па шэрагу саставаў злачынстваў спецыяльна створаная пры Адміністрацыі прэзідэнта працоўная група.
У праекце закона "перагледжаны санкцыі 97 саставаў злачынстваў. З іх 65 саставаў дапоўнены альтэрнатыўнымі больш мяккімі відамі пакаранняў", гаворыцца ў паведамленні прэзідэнцкай прэс-службы.
Адзначаецца, што зараз у крымінальным заканадаўстве Беларусі па 24 саставах злачынстваў можна прызначаць толькі пазбаўленне волі.
Як раней паведамлялася, пытанні ўдасканалення заканадаўства ў частцы крымінальнай адказнасці былі абмеркаваны 11 студзеня 2024 года на вялікай нарадзе ў кіраўніка дзяржавы. Тады Лукашэнка даручыў стварыць працоўную групу, якая правядзе аналіз законаў, Крымінальнага, Крымінальна-працэсуальнага кодэксаў, ужывання іх норм, а потым распрацуе праект закона.
Не пазбаўляць волі
У праекце закона, які прэзідэнт накіраваў у Авальную залу, прапануецца не прызначаць пазбаўленне волі жанчынам і адзінокім мужчынам, якія ўпершыню ўчынілі няцяжкія злачынствы і выхоўваюць дзяцей ва ўзросце да 14 гадоў. Пад гэтую норму трапляюць таксама непаўналетнія і інваліды І групы.
"Выключэнне – выпадкі, калі асоба здзейсніла злачынства экстрэмісцкай накіраванасці або звязанае з ужываннем гвалту", - гаворыцца ў законапраекце.
Аналагічныя нормы прапануюцца і ў частцы ўзяцця пад варту.
Без сямейных канфліктаў
Таксама, згодна з праектам закона, узбуджаць крымінальныя справы па ДТЗ, у якіх пацярпелі сваякі, можна будзе толькі па заяве пацярпелых.
"Пераводзяцца ў справы прыватна-публічнага абвінавачання (узбуджаюцца па заяве пацярпелага) злачынствы аб парушэнні ПДР, якое прывяло да прычынення шкоды блізкім сваякам або членам сям’і вінаватай асобы (ч.2 арт.317 Крымінальнага кодэкса)", - сказана ў паведамленні.
Гэта мера, на думку распрацоўшчыкаў законапраекта, будзе накіравана на ўнутрысямейнае ўрэгуляванне канфлікту.
Пакаранне за наркотыкі
Праектам закона прапануецца змяніць шэраг норм адказнасці за злачынствы, звязаныя з наркотыкамі. Тут прадугледжаны меры пакарання, альтэрнатыўныя пазбаўленню волі.
Прапануецца прымяняць арышт на тэрмін да трох месяцаў за набыццё або захоўванне наркотыкаў (ч.1 арт.328 КК); абмежаванне волі за разавыя выпадкі іх збыту (ч.2 арт.328 КК).
Акрамя гэтага, мяняецца ніжняя планка пакарання за збыт наркотыкаў у складзе арганізаванай групы – з 10 да 8 гадоў пазбаўлення волі.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"