X Міжнародны ваенна-тэхнічны форум "Армия-2024" праходзіць з 12 жніўня ў парку "Патриот" у Падмаскоўі. У экспазіцыі – амаль 30 тысяч экспанатаў. Мерапрыемства наведваюць 120 замежных дэлегацый.
У мерапрыемстве ўдзельнічаюць вытворцы ваеннай тэхнікі і ўзбраенняў "Объединенная авиастроительная корпорация ", "Вертолеты России", "Техмаш", ЦКБ "Рубин", "Высокоточные комплексы", "Росэл", "Калашников" і іншыя.
Удзельнікамі выставы сталі і беларускія збройнікі. У іх ліку – флагманы беларускай зброевай галіны: МЗКЦ, 2566 завод па рамонце радыёэлектроннага ўзбраення і 558 Авіяцыйны рамонтны завод, паведамілі ў прэс-службе Дзяржаўнага ваенна-прамысловага камітэта Беларусі.
Там удакладнілі, што калектыўны стэнд Дзяржкамваенпрама арганізавала прадпрыемства "БЕЛТЭХЭКСПАРТ". У прыватнасці, на беларускім стэндзе прадстаўлена каля 250 узораў прадукцыі ваеннага і падвойнога прызначэння, уключаючы макеты і натурныя ўзоры РСЗА і ЗРК, беспілотнікі розных тыпаў, кампаненты для вытворчасці авіятэхнікі, сродкі сувязі і РЭБ, платформы, якія хутка разгортваюцца, медабсталяванне, сістэмы кіравання агнём, аптычныя і лазерныя прыборы і шэраг іншых вырабаў.
У экспазіцыі форуму таксама шырока прадстаўлена трафейная тэхніка, у прыватнасці амерыканскі танк Abrams, нямецкі Leopard, аўстралійскі бронетранспарцёр Bushmaster і іншыя экзэмпляры з краін НАТА.
Раней у Міністэрстве абароны РФ паведамілі, што форум пройдзе без масавага наведвання ў фармаце асабліва дзелавога мерапрыемства. Яго ўдзельнікі – профільныя спецыялісты, кіраўнікі і генеральныя канструктары абаронных арганізацый. Таксама форум наведваюць запрошаныя замежныя дэлегацыі.
Працягнецца форум "Армия-2024" па 14 жніўня.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"