МІНСК, 13 вер – Sputnik. Кіраўнік беларускай дзяржавы Аляксандр Лукашэнка адобрыў праект міжурадавага пагаднення паміж Беларуссю і Сейшэльскімі Астравамі аб паветраных зносінах, адпаведны ўказ прэзідэнта ад 12 верасня №359 апублікаваны ў пятніцу на Нацыянальным прававым інтэрнэт-партале.
У дакуменце гаворыцца, што праект гэтага міжнароднага дагавора стане асновай для правядзення далейшых перагавораў. Праводзіць іх беларускі лідар упаўнаважыў міністэрства транспарту і камунікацый.
Пры гэтым прадстаўнікам профільнага ведамства дазволена пры неабходнасці ўносіць у праект пагаднення змяненні, але яны не павінны мець "прынцыповага характару". Таксама Мінтранс зможа падпісаць гэты дакумент, калі бакі дасягнуць дамоўленасці.
Дэталі пагаднення
Як растлумачылі ў прэс-службе беларускага прэзідэнта, гэтым пагадненнем вызначаецца, якім чынам паміж дзвюма краінамі будуць ажыццяўляцца палёты, пасадка і высадка пасажыраў, а таксама перавоз багажу, грузу і пошты.
Рэалізацыя міжнароднага дагавора з Сейшэльскімі Астравамі дазволіць бакам не толькі гарантаваць бяспеку палётаў, але і развіць узаемавыгаднае супрацоўніцтва ў галіне авіязносін.
Хочаце яшчэ больш актуальных і цікавых навін – падпісвайцеся на Telegram-канал Sputnik Беларусь, чытайце нас у Дзэн, а таксама сачыце за намі ў сацсетках "Одноклассники" і "ВКонтакте"