Штрафы за прапаганду бяздзетнасці плануюць увесці ў Расіі

МІНСК, 24 вер – Sputnik. Законапраект, накіраваны на забарону ідэалогіі бяздзетнасці з увядзеннем адміністрацыйнай адказнасці, разглядаюць у Расіі, заявіў спікер Парламента РФ Вячаслаў Валодзін.

Ён удакладніў, што размова ідзе аб тым, каб перашкодзіць распаўсюджванню інфармацыі, якая папулярызуе бяздзетнасць.

Паводле слоў Валодзіна, у тэматычных пабліках і супольнасцях у сацыяльных сетках усё часцей праяўляецца непавага да мацярынства і бацькоўства, агрэсія ў адносінах да цяжарных жанчын і дзяцей са шматдзетных сямей.

У сувязі з гэтым у Дзярждуме разглядаюць законапраект, у якім прапануецца забараніць прапаганду бяздзетнасці ў інтэрнэце, СМІ, кіно і ў рэкламе. Акрамя гэтага, парламент мае намер увесці за гэта адміністрацыйную адказнасць.

Штрафы за парушэнне складуць да 400 тыс расійскіх рублёў для фізічных асоб, да 800 тыс рублёў для службовых асоб і да 5 млн рублёў – для юрыдычных асоб.

Ён адзначыў, што дружная і вялікая сям’я – аснова моцнай дзяржавы.

Чайлдфры – гэта субкультура, якая характарызуецца свядомым жаданнем не мець дзяцей. Але гаворка не ідзе аб людзях, якія адкладаюць нараджэнне дзяцей на пазнейшы тэрмін або не маюць цвёрдай рашучасці ў гэтым пытанні.

Забарону руху чайлдфры ў краіне абмяркоўваюць не адзін год. Раней расійскія грамадскія дзеячы прапанавалі блакіраваць тэматычныя супольнасці ў сацсетках. Аднак псіхолагі ініцыятыву не падтрымлівалі. У мінулым годзе законапраект аб забароне прапаганды ідэй чайлдфры сярод дзяцей уносіўся ў Дзярждуму, аднак ініцыятыву зноў адправілі на дапрацоўку.

Цяпер пакет законапраектаў прадугледжвае адказнасць за прапаганду чайлдфры, але не закране лад жыцця і выбар расіян. Гаворка ідзе толькі аб прапагандзе ідэалогіі бяздзетнасці, а не аб ладзе жыцця і выбары кожнага чалавека.

Перад унясеннем дакумента на разгляд у ніжнюю палату парламента будуць улічаны ўсе заўвагі, указаныя ў заключэнні ўрада. У прыватнасці, паняцце "адмова ад нараджэння дзяцей".